Ababalisi bafuna umthetho wokuvikela izikolo

Umbiko onzima okhitshwe ngabe Progressive Teachers Union of Zimbabwe usukhuthaze ukuthi kwenziwe umthetho ozokwenza kube licala ukubamba ezombang-azwe ezikolo, ikakhulu ngezikhathi sokhetho.

Umbiko lo okhitshwe kuyonale inyanga othiwa, ‘Udlame lwezombangazwe lokwethuselwa kwababalisi e Zimbabwe’, wenzelwe abe PTUZ ngabe Research and Advocacy Unit.

Kusukela kusungulwa I MDC ngo 1999, sokube lenhlelo zokhetho ezinhlanu ezinkulu lezinengi ezincinyane, zonke ebezilodlame olukhulu kwabalandela amabandla aphikisayo.

Ababalisi, ikakhulu emaphandleni, bakhathazwe kakhulu ngalesi sikhathi libandla le Zanu (PF), ebelisehluleka ukuthola usekelo ebantwini laphendukela ababalisi lithi yibo abalomlandu.

Udlame lolu lubalisele ukuchukuluzwa, ukutshaywa, ukuthunjwa, ukunyamalaliswa lokudlwengulwa kwabantu, kukanti impahla zabanye kunye lemizi kuchithizwiwe kakhulu. Lokhu kubulale kakhulu imfundo.

“Udlame olunengi lwenzakale ngamahola esikolo, phambi kwabantwana besikolo, okuyinto embi ezokwenza abantwana bakhule besithi udlame luhle,” kutsho umbiko lo.

Umbiko lo uthe njalo bekukhona indawo ezinengi zokubhuqela abantu ezikolo kuziqinti ezingamatshumi amane layisithupha. IRAU ikhulume lababalisi abayinkulungwane lamakhulu amabili, abakhethwe mahlayana ezikolo zakuleli.

Abalikhulu lamatshumi amabili bathe bangabaqamba labo ababahlukumezayo ngaleso sikhathi.

“Okubalulekileyo yikuthi indawo lezi beziphethwe ngabesibuthweni,” kustho umbiko lo.

I PTUZ ikhuthaze abe Joint Monitoring and Implementation Committee, abalomlandu wokubona ukuthi izivumelwano zika 2008 ziyalandelwa phakathi kwabe MDC labe Zanu (PF), baphenye kabanzi ngodlame kubabalisi.

Post published in: News

Leave a Reply

Your email address will not be published. Required fields are marked *