Usenze amaphutha ngokukhetha kwakhe, wasala eyangekile. Ezama ukuvala isikhala esatshiywa ngunkosikazi wakhe u Susan osowabhubhayo, uTsvangirai useqe kulo umbheda way kulowana, etshiya ingcekeza esabekayo emuva kwakhe.
Abesintwana asezwane labo sebeveze okwesabisayo ngaye, ikakhulu lapho esezama ukutshada lo Elizabeth Macheka. Bakhulume ngendlela athembisa ngayo ukubathatha, kunye lokuthi wayelala labo engazivikelanga, kungela kuhlolisiswa ngegciwane lesandulela-ngculaza.
Izenzo zakhe sezidonse ukuchothozwa okusuke kuwo wonke uzulu. Abantu sebemchothoze kakhulu ngokukhetha kwakhe kobuwula, kunye lokukwehluleka ukuchwayisisa ngabafazi labo, inengi eseliphenduka abantu abazidingela nje imali.
Sebemchothoze ngokwenza izinto ngokukhawuleza, engagqize qhakala ngalokho okuzadalwa yizenzo zakhe lezi. Ikakhulu, u Tsvangirai, ngokungeqiwa yisidwaba, usezenze waba lula kuzitha zakhe lalabo ancintisana labo.
Khathesi sokufanele aphile lomthwalo onjengo Locardia Karimatsenga, lowo amlobole qede wamlaxaza – kuhle ngoba engomunye wabalandeli be Zanu (PF) njalo ebambane lempimpi zikahulumende. Ngokomthetho, usayinkosikazi yakhe njalo kusobala ukuthi usengabelana laye impahla nxa besehlukana.
Phecelezi, u Tsvangirai usebonise ukuswelakala kwenhlakanipho okusobala mayelana lendaba zocansi. Kodwa angafunda okunengi mayelana lempilo yakhe yezombangazwe kunye lesimo sakhe njengenkokheli kulawo maphutha akhe.
Okokuqala, kufanele abone ukuthi njengenkokheli, kuyadingeka ukuthi akhethe ngonanzelelo labo azosebenzelana labo njalo abhekisise imilayo yabo kuye. Ngokusobala, singambeki msulwa, uTsvangirai uchithwe yizenzo zalabo abebathembile.
Ngokukhuthala kwakhe, kunzima ukuthi achwayisise kabanzi ngalabo athandana labo, kodwa inengi lathandana labo lilethwa yilabo ahamba labo, kukanti sesibone abanengi kakhulu abeza kuye, kubalisela abafundisi labanye abebandla lakhe.
Labo bebeminyezelana, bezama ukumtholela umfazi omfaneleyo, besenzela ukuphathwa kahle ngulowo ozakuba ngumongameli welizwe ngolunye usuku. Asingephike njalo ubuthengisi obebungeza labanye babo.
Banengi kakhulu abathengisi kubangane. Bahleka lawe, kodwa bakukhokhelele endleleni embi lapho ungaqaphele.
Kufanele njalo u Tsvangirai afunde ukungabhekeli phansi izitha zakhe kunye lalabo ancintisana labo. Ngesikhathi elala amalombolombo, ngethemba ubengakhangelelanga ukuthi izitha zakhe bezembula okuvaliweyo abekwenza ukuze zimgwenxe ngakho. Njengoba ngiloba, abalwisana laye ku Zanu (PF) baledili elikhulu.
Batshela wonke olaleleyo ukuthi uTsvangirai kafanelanga ukubusa ngoba esehluleka ukuzibamba ngokocansi. Bathatha amathuba kuwo wonke amaphutha akhe ukuze bamngcolise njalo u Locardia ungomunye walabo abazimisele ukusetshenziswa ngalindlela.
Kuyangisa kanjani ukuthi, ngemva kokubiza inkokheli zangaphandle labanye abaqakathekileyo emtshadweni wakhe, abezitshela ngobuwula ukuthi uzoqhubekela phambili, kodwa kuze ingcosana ngenxa yengxabangxoza yonke elandeleyo?
Ngempela ukuphumelela kuka Locadia ukumisa lumtshado ngenkantolo kubulele isithunzi sika Tsvangirai kwabanengi eningizimu yezwekazi lase Africa langaphandle. U Pius Ncube uzavuma ukuthi nxa usilwa labe Zanu (PF), kufanele ungenzi amaphutha amgceke kanje. Oka Ncubelaye kwakumele ahlakaniphe kakhulu, angamthinti loya owesintwana ngoba ubelusiwe.
Ngokwesithathu, u Tsvangirai kumele ananzelele ukuthi akumelanga uphathe abantu njengeziwula. Ngingaba ngowakuqala ukuvuma ukuthi ubengabatshayi ndiva labo omama abethandana labo. Akuvumelekile ukuthi indoda ilale lowesinthwana kanye, immithise ibisifisa ukuthi anyamalale nje kanjalo. Akuvumelekile ukuthi indoda itshade lowesintwana ibe simlaxaza nje ngosuku olulandelayo ngoba isithole omunye.
Balinganise omama labo labanye nje abahlala kuleli. Ngubani ongahlonipha inkokheli ephatha abantu bayo ngokubahlambalaza, ukuthandabuza kunye lokunganaki? Akekho. Lanxa nje kumele ezothando zikaTsvangirai zihlale ziyimfihlo, kuyadingeka ukuthi laye afunde kumaphutha akhe asewenzile ukuze abe yinkokheli yoqobo.
Post published in: News