Utshele umhlaba amanga aluhlaza wathi u Tsvangirai kangenqobe kukhetho oluzayo, bekungamanga akuqala. Okwesibili, uthe u Tsvangirai ubekhankasa njalo eqoqa abantu ngaphandle kwentando yabo.
Ngokwesithathu, ubefuna sikholwe ukuthi abalawuli bamabutho baphikisana loTsvangirai ngoba lumkhokheli weMDC uyibuso bokubuyisela emuva isivuno sempi yenkululeko, leyo abazinikela kuyo.
Amanga esine; ubezama ukusenza sivume ukuthi ubekhulumela amabutho, hatshi ibandla lakhe, kukanti ngokwesihlanu, uthe yena umbutho ungammisa uTsvangirai laye wonke umuntu ongamthandi ekuzameni ukubusa.
Kungamanga aluhlaza ukuthi u Tsvangirai akekho kuso isimo sokunqoba kukhetho. Wanqoba ngehlandla lakuqala lika 2008, njalo eqinisweni akekho umuntu ongakuboniyo ukuthi iZEC ngesikhathi ibamba impumela yokhetho lukamongameli lukaMbimbitho walowo mnyaka ibizama ukupheka inombolo yokuphazama.
Yiphi enye ingcazelo kulokho? Impazamo, njengosiko lweZanu, lunguTsvangirai leMDC bebusa iZimbabwe. Leyo nombolo yehliselwa emqhudelwaneni wesibili phakathi kuka Tsvangirai loRobert Mugabe, okunengi sokwedlula.
Kambe nga uTsvangirai ubekhankasa ngaphandle kwentando yetho njengabaseZimbabwe? UChinamasa kufanele uyibonile inhlamba kulinkulumo yakhe. Yibaphi abantu abathi bangabeZimbabwe? Ukuba ngoweZimbabwe kwehlukile lokuba ngusanqondo we Zanu (PF).
Ukucabanga kwami ngendlela ehlukileyo ebantwini abanjengo Chinamasa, uNicholas Goche, uRugare Gumbo kunye lo Mugabe akungenzi ngibe ngaphansi kwabo ngobuzwe bami.
Kungani vele uChinamasa ecabanga ukuthi singaphongulandela ukukhankasa kukaTsvangirai? Abakuleli bacabanga bebodwa njalo u Tsvangirai akasinkulunkulu esimlandela ngobuphofu. Lapho abantu abacabanga ukuthi uphambanise khona, siyakutsho lokho, njalo sesikwenzile ngendaba zakhe zamehlomehlo, njalo ngeke sama.
Kuyibuwula njalo ukucabanga ukuthi umbutho ungamvikela u Tsvangirai ekubuseni ngoba usesabela ukuthi uzaphendulela inkululeko. Abalawuli bamabutho abalandaba lesivuno senkululeko esiqotho, ikakhulu intando yenengi.
Kubo, isivuno lesi sitsho inqumbi yezimota abalazo, imali enengi ngaphandle kwelizwe eyakhelwe ebuseleni bendayimani zaseDRC, amapulazi aqhwagelwa abelungu lezindlu emasabhabha.
Lokho yikho abakuthi nguzibuse, hatshi okunengi, njalo kungakho bengafuni kuguqulwe umbuso. Kubo, inengi elingaqhatsheki ndawo, uTsvangirai wethusela okwebiwayo kwabo.
Lanxa iMDC ibibundikindiki ngalokho ekufunayo, ikakhulu ekuqaleni, angiboni sengathi isingathathela abantu amapulazi abahlaliswe kuwo kakutsha. Lelibandla lathi alivumelani kuphela lendlela umhlaba owathathwa ngayo.
UChinamasa akalisizi ngalutho ibandla lakhe lakanci. Ngokuzama ukukhulumela abalawuli bamabutho, uveze kuphela ebesesikwazi; ukuthi akulamehluko phakathi kombutho leZanu (PF).
Sesibezwile abalawuli bekhuluma mgceke ngalokhu, kusukela ngo2002, anduba kubanjwe ukhetho lukamongameli, lapho u Vitalis Zvinavashe labanye bakhuluma kabanzi ngalokho abakumeleyo. Ukukuphinda kwabo kwenza kuphela abalwela inkululeko babelendlela yokwenza imbali ibahlulele.
Ngamanga esihlanu, kungabakhona yini otshela uChinamasa labanye bakhe be Zanu (PF), ndawonye lamabutho ayewakhulumela, ukuthi izinto ziguqukile?
Bekufanele uChinamasa asitshele thina izizalwane zoqotho zeZimbabwe ukuthi uMugabe waphoqelelwa ukungena kuhulumende womanyano ngoba uhulumende wakhe ebesephelelwe ngumphako lenhlonipho emphakathini wangaphandle. Ukuhluthuna umbuso kubulala wonke uhulumended wamanga njalo angikuboni kusenzakala lokho kuleli.
Post published in: News