Inkokheli zebandla leli, kugoqela labakukhomithi emiyo labanye abangongqongqotshe, bebezama ukuma bengancintiswanga kukhetho lwebandla oluzobanjwa maduze.
Umqogi-jikelele walelibandla, u Nelson Chamisa, uthe abayikwenza njengeZanu (PF), yona evumela inkokheli zisalela ezikhundleni njalo aliyikuvumela abezopolitiki bezethesa umqhele ebantwini.
“Izikhundla zonke zizomelwa okhethweni ngoba njengebandla sesithe abantu abafuna ukukhokhelwa kufanele bazikhethele lowo obakhokhelayo,” kutsho okaChamisa.
Wengeze wathi ukhetho lwebandla luzobanjwa kuyo yonke indawo ezomelwa kukhetho olukhulu lomnyaka ozayo. “Zonke izikhundla zizomelwa njalo sesitshelwe ukuthi sihloniphe isinqumo sekhomithi emiyo.”
Oka Chamisa uqonqosele abaxotshwa libandla leli njengamakhansila ukuthi bayeke ukuzifaka ezikhundleni lezi ngoba sebephoxe ibandla.”
“Kukhona ingxabangxoza ngoba kulabanye abazama ukuqhubeka besebenza ngetikiti leibandla, kukanti thina sesithethe isinqumo sokuthi kufanele bame ngoba basiphoxile,” kutsho uChamisa.
Owaxotshwa njengokhansila ka Ward 7 eChitungwiza, uTinashe Kazuru, uthe uyasihlonipha isinqumo sebandla, kodwa wathi ukuxotshwa kwakhe akukho endleleni.
“Akulandelwanga indlela eyiyo ngoba akuzange kwaba lophenyo olwenziwa lwathola ukuthi sonke sikhohlakele,” kutsho u Kazuru.
Uthe njalo amakhansila abesebhale incwadi ezinengi ekhonona ngokuxotshwa kwawo, kodwa akwabuya ngitsho lenye impendulo.
Post published in: News