I ZBC ilezititshi ezine zomsakazo kunye lesinye esisebenzisa umugcwa omncinyane esisebenzela eGweru iVoice of Zimbabwe. Yiyo njalo ephethe yena yedwa umabona kude wakuleli – iZTV.
Kulinyanga edlule, izisebenzi ezizifihlileyo, ziveze incwadi ende elandise kabanzi ngobugilimbane obenziwa yizikhulu zabo, ezikhokhelwa ngu Happison Muchechetere, ongumlweli wempi yenkululeko.
Incwadi le ibibhekiswe kwababheka ngezobukhohlakali kuleli njalo iqondiswe laku mphathintambo wezembiko, u Webster Shamu.
Izisebenzi zithi abaziphetheyo bazengezelele umholo waba phakathi kwenkulungwane ezinhlanu lezingamatshumi amabili amadola kunye lezinye izimali ezinengi, kukanti labo abaphansi baphiwa nje okungamakulu okuthathu kusiya kokuhlanu ngenyanga, okungabhadalwa ngesikhathi.
Abaphatheke kabi laba, batshele iphephandaba leli ukuthi abakayitholi imali yabo kaNcwabakazi njalo izikhulu zabo azitsho lutho ngalokho.
“Bala kuphela ngokuthi inkampani ayilamali,” kutsho esinye isisebenzi e Pockets Hill. “Kubuhlungu lokhu ngoba siphila ubuyanga bona besidla inkalakatha yemali bodwa babuye baziphe izikwelede ngemali okufanele siyihole,” kutsho esinye isisebenzi.
Abasebenzela eGweru bathi bamangazwe ngamatshumi ayisithupha amadola njengeholo ngeviki edluleyo. “Ungenzani ngenhlamba njalo kunguwe ngemva kokuhlala izinyanga ungaholanga?”
Esinye isisebenzi sithe ukukhonona okwenziwe kwabe Anti-Corruption Commission yikho osokubadonsele amanzi ngomsele, wathi njalo abakhulu sokufanele bayingenele lindaba.
“Sokungazathi siyajeziswa ngokuchaya iqiniso linjengokuba ngoba khathesi sebeziqhenya okwamagama kulakuqala, kukanti abesikomitshi lesi abenzilutho kubo.”
Isikhulumeli seZBC, uSivukile Simango, utshele iphephandaba leli ukuthi izisebenzi lezi sezize zahola. “Sebehole yonke imali yabe abebeyikweledwa, njalo into ezinje angizikhulumi lamaphephandaba mina,” kutsho oka Simango.
Post published in: News