News in Ndebele 15-06-06

“urn:schemas-microsoft-com:office:smarttags” />HARARE – Umkhokheli webandla leMDC umnumzana Morgan Tsvangirai uthi ibandla lakhe liqhubekela phambili likhuthaza ukutshengisela kwezwe lonke lobanje engasatshongo ukuthi lokho kuzakwenzakala nini.

Ngeviki ephelileyo uTsvangirai utshele abezindaba ukuthi inhloso yokutshengisela lokho kayisiyo yokugenqula uMugabe esihlalweni kodwa yikupha uzulu weZimbabwe ilungelo lakhe lokuveza ukungasuthiseki kwakhe ngombuso okhona.

Lobanje uTsvangirai waveza emhlanganweni omkhulu webandla lakhe ukuthi kabasela themba ekusebenziseni ukhetho ekuletheni inguquko eZimbabwe, uthe ibandla lakhe lizaqhubeka lingena kolunye ukhetho abalubona luqakathekile.

IMDC ekhokhelwa nguTsvangirai isanda kunqoba ekhethweni lokudinga umeli weBudiriro edale lephalamende njalo ikhangelelwe ukungena ekhethweni lokudinga umeya weChitungwiza leKadoma. IMDC ikhangelelwe ukunqoba eChitungwiza kuthi iZANU pf layo ingahle ithathe isihlalo sikameya weKadoma. – ZimOnline

Church leaders bribed – says Ncube

Abafundisi bafunjathisiwe – kutsho uNcube
UMLOBI NGUVIOLET GONDA

BULAWAYO – Omunye umfundisi useveze iqhinga elisetshenziswa nguMongameli Mugabe ukulwisa abafundisi abangavumelani lendlela aqhuba ngayo izinto. Kubikwa kulabanye abafundisi abeza enkonzweni bethunywe nguhulumende njengenhloli.

Lokhu kuvezwe ngumfundisi okhokhela ibandla le Roma koBulawayo uArch Bishop Pius Ncube yena othe abezenkolo eZimbabwe sebelahlekelwe yisithunzi ngenxa yokuvuma kwabanye ukusetshenziswa nguhulumende.

Ekhuluma ehlelweni lomsakazo weSW Radio Africa, uNcube uthe inkokheli zamabandla enkolo sezihlobise umoya wabazalwane ngokuvuma ukusetshenziswa ekuphumeleliseni imisebenzi emibi kahulumende. Uphinde wathi bakhona abafundisa abathola isifumbathiso kuhulumende ukuze benze lokho akutshoyo. Lobanje alile ukuveza amagama okusegcekeni, uthe liqiniso elaziwayo ukuthi umfundisi weAnglican uNobert Kunonga Lomfundisi Msindo bathola amapulazi. UNcube uthi laye ungomunye owayephiwe ipulazi kodwa wala.

Uqhubeke wathi uhulumende wazi mhlophe amandla abezenkolo yikhonje esehlukanisa phakathi abafundisi ngokupha abanye isivalamlomo. UNcube uthi lokhu kulihlazo ngoba abafundisi bakhangelelwe ukuma labampofu kanye lokubavikela hatshi ukuzitshwathika emakhwaphezi ezikhulu.

Abezindaba elizweni basanda kwethula imibiko lapho unobhala jikelele webandla leZCC uDensen Mafinyane etshele uMugabe ukuthi siyakuthanda njalo siyakusekela. Lokhu kugcizelelwe njalo ngumkhokheli waleli bandla uPeter Nemapare yena othe siyazi ukuthi silohulumende okufuze zimsekele.

Esephendula kuleyo mbiko uNcube uthe vele kuyaziwa ukuthi uNemapare uhleli esekela uMugabe njengoba vele laye kuyinceku engathembekanga ezisebenzisela impahla zebandla enkanukweni zayo.

Journalists set up media council

Sekubunjwa ikhansili yezezindaba

BULAWAYO – Intathelizindaba eZimbabwe zithi zizasungula ikhansili ezabona ngokwethulwa kwezindaba enyangeni ezinhlanu ezizayo. IZimbabwe ngenye yamazwe alemithetho elukhuni kakhulu kwezokwethulwa kwemibiko. Le milayo igoqela eyokuthi intathelizindaba ilakho ukubhadla ejele okweminyaka emibili ingatholakala isenza umsebenzi ingatholanga icence lokwenza lokho kanye lokuthi ingangena endlini emnyama okomnyaka ogcweleyo nxa kungatholakala ukuthi ithethise umongameli Mugabe endabeni eyabe iyibhalile.

Inhlanganiso yomanyano wentatheli labaququzela amalungelo okwethula imibono kungelakuhlukunyezwa eye Media Alliance of Zimbabwe (MAZ), isileminyaka emithathu ikhuthaza ukuthi kubunjwe ikhansili ezimeleyo ehlola ukwethulwa kwezindaba. Imizamo le ibhicabhicwe nguhulumende yena oyethule imithetho elukhuni encindezela ukwethulwa kwemibiko okukhululekileyo.

Ikhansilile izakuba lenkokheli zayo ezilawulwa ngamalunga eBoard alitshumi lambili. Umgcinisihlalo wayo uzakuba ngumehluli wedale laphezulu osesekuphumuleni. Izamela abagoqela abalobi, abezenkolo, inhlanganiso zomphakathi, intathelizindaba kanye labacubunguli.

Okwamanje ezezindaba eZimbabwe zikhokhelwa yikomishini kahulumende eye Media and Information Commission (MIC). Umgcinisihlalo wekomiti leyo owaziwa kanye ukuthi usekela umongameli Mugabe, UTafataona Mahoso, uhleli ekhulunywa kabi ngomuntu wonke esolwa ngokuzama ukwenqabela ukusebenza kwalabo abethula izindaba bezimele osekubangele ukuthi kuvalwe ukusebenza kwamaphephandaba amane.

Yikomishini efanayo ekaMahoso esibangele ukubotshwa kwamakhulu entathelizindaba zisetheswa ukwephula umthetho kahulumende olukhuni impela olawula ukutholakala kwemibiko lokuvikelwa kwaleyo eyimfihlo. – ZimOnline