jalo bathunywa ngubani. Kungenzeka ukuthi bathunywa ngabebandla elikhulu eleMDC kumbe bahlawulwa yiZanu (PF) ukuthi benze lokho.
Ngowami umbono ngithi lababantu yizithunywa zeZanu (PF). Kayikho inhlanganiso engelabo abalomkhuba wokudala udlame. Esinye isiphathamandla esasisebandleni leZAPU sike sezwakala sisithi sonke sasicina sesidala udlakela ngenxa yomumo. Yinike engenza labo abasebandleni leMDC bengathatheki njengalabo ababengazimiselanga ukudala udlakela kodwa umumo wababamba ngamandla. Kungabe kukhangelelwe ukuthi iMDC ilawule amalunga ayo na?
Kusegcekeni ukuthi okweminyaka engamatshumi amane besithukuthelele isitha sethu kodwa leyo ntukuthelo isize yadlulela phambili kayisaphelelanga kuZanu (PF) kuphela. Kuliqiniso ukuthi kufanele sidinge ukujeziswa kwalabo abangababulali kodwa kuhle ukuthi sibakhombise lapho abaphambanise khona.
33 die of malnutrition-related diseases
Abantu sebeqedwe yindlala.
BULAWAYO – Abantu abangamatshumi amathathu lantathu kubikwa befile ngenyanga kaMarch ngenxa yemikhuhlane ebangelwa yikusilela kokudla okwakha umzimba koBulawayo. Lokhu kuvezwe ngumbiko wohlangothi lwekhansili yedolobho olubona ngezempilakahle. Limbiko eyethusayo iveza sobala inkinga zeZimbabwe zomnotho kanye lokusilela kokudla.
Lobanje okwamanje kunguMeya wakoBulawayo kuphela uJaphet Ndabeni Ncube oseveze imbiko yalaba bantu abafayo ngenxa yokusilela kokudla, ingcitshi zithi benengi asebefile kungavezwanga kugoqela lesigodlweni seHarare. Selokhe uMugabe waqala uhlelo lwakhe lokuthathela abelungu amasimu ewapha kwabensundu ilizwe selivelelwe yindlala engakaze ibonakale.
Uhulumende kaMugabe useyehlulekile ukupha abalimi abatsha ulwazi lwezokulima loba impahla zokulimisa okuyikho osekudale ukuthi kube lendlala eyesabekayo.
Inhlanganiso ezipha ukudla emhlabeni jikelele zithi kusiyaphela lonyaka abantu abedlula izigidi ezintathu eZimbabwe bazabe sebedinga ucedo lokudla. Loba kunjalo uMugabe lohulumende wakhe baqhubekela phambili besithi lokho kakusoke kwenzakale ngoba kuzaba lesivuno esihle. Inkulumo efana laleyo isike yakhulunywa iminyaka ilandelana kodwa kusiba sobala ukuthi ngamanga. – Zimonline
Civic groups to boycott human rights conference
Inhlanganiso zikazulu kazizukuya emhlanganweni wezamalungelo.
HARARE – Inhlanganiso zikazulu lezamalungelo oluntu eZimbabwe, zithi kazisoke ziye emhlanganweni wezamalungelo oluntu oqoqwe ngokusekela kwenhlanganiso yezizwe zomhlaba kuyonale inyanga. Umqondisi wenhlanganiso yeZimbabwe Lawyers for Human Rights, uArnold Tsunga utshele iZimonline ukuthi inhlanganiso lezi zithi kazizukuya kulo umhlangano ozabe ukhuluma ngecebo likahulumende lokubumba ikomishini yezamalungelo oluntu, ngoba kuzakwenza sengathi basekela ikomishini kahulumende leyo.
UTsunga uthi bona bakholwa ukuthi inhlanganiso yezamalungelo iyingxenye yalokho okudingeka embusweni okhululekileyo eZimbabwe kugoqela isisekelo sombuso esitsha lokuhlonitshwa komthetho. Uqhubekele phambili wathi kunengi okusafuze kwenziwe kungakabunjwa ikomishini yezamalungelo. Uthi kusobala ukuthi uhulumenmde weZimbabwe ufuna bemukele leyo komishini. UTsunga uthi bakhangelele ukuthi kube lesisekelo sombuso esitsha hatshi ukuthi kuqalwe kukhulunye ngekomishini yezamalungelo kungakalungiswa imithetho elawula lawo malungelo. – Zimonline.
MDC meetings banned on ‘flimsy’ pretext
Imihlangano yeMDC iyenqatshelwa.
CHINHOYI – Amapholisa eZimbabwe ngeNsonto enqabele IMDC ekhokhelwa nguTsvangirai ukuqhuba umhlangano isithi inkundla abafuna ukuyisebenzisa kayilazambuzi. Lo besekungumhlangano wesibili ocine ungasaqhutshwanga ngemva kokwala kwamapholisa. Umnumzana Tsvangirai ngokwakhe kubikwa enqatshelwe ukukhuluma labasekeli bakhe eKwekwe kuthiwa kwesatshelwa ukuthi ubakhuthaza ukuvukela uhulumende.
Umgcinisihlalo weMDC eMashonaland West uJaphet Karemba uthi kusegcekeni ukuthi amapholisa kawafuni imihlangano yeMDC endaweni ezaziwayo ukuthi uMugabe ulosekelo khona.
IMDC kanye lekomishini yezamalungelo oluntu eAfrica bethesa uhulumende weZimbabwe umlandu wokusebenzisa amapholisa lamasotsha ukuncindezela ibandla leMDC. Uhulumende yena uyakuphika lokho. – ZimOnline
Independent radio stations jammed
Amagagasi emisakazo ezimeleyo ayavinjwa.
HARARE – Ngemva kokusebenzisa imitshina yakweleChina ukuvimba amagagasi omsakazo weSW Radio Africa, uhulumende weZimbabwe kubikwa esehlasele njalo amagasi omsakazo weStudio 7. Lobanje amagagasi eStudio 7 abesangena endaweni eziphandle kweHarare, kubikwa iziphathamandla zikahulumende zisebenza imini lobusuku ukuwenqabela.
Isikhulumeli se Studio 7 uJoe O’Connell utshele ikomiti evikela amalungelo entathelizindaba ukuthi amagagasi omsakazo wabo ayenqatshelwa lobanje emakhaya abelokhu esafika kuhle. Umsakazo weSW Radio Africa lawo uthi uhulumende useqalile njalo ukuvala amagagasi awo angena kuMW eHarare, lobanje ezinye indawo zelizwe zingakabi lalolo hlupho.
Ababona ngokwenzakala ezindabeni abe Media Monitoring Project Zimbabwe (MMPZ), bathi leso senzo sikhombisa ukuthi uhulumende ulovalo ngokutholakala kwemibiko engathathi hlangothi lokuvezwa kweqiniso. Esinye isiphathamandla sogatsha lwenhloli zikahulumende sitshele iZimonline ukuthi bayathokoza ngomsebenzi osuwenziwe ngomanjinela babo ekwenqabeleni amagagasi eStudio 7 wathi bakhangelele ukuhle bawavale ngci emitshineni asuka kuyo kwele Butswana. – Intatheli yeZimbabwean.