u elikhokhelwa ngumsekeli kamongameli (igama lakhe silalo).
Abangaphakathi batshele i The Zimbabwean ukuthi iqembu lakhona lileziphathamandla zikahulumende ezinkulu.
UNhara, owayengumqondisi omkhulu ewofisini kamongameli Robert Mugabe, wafa mhlaka May 28 ngemva kokubotshwa ezama ukukhupha phandle kwelizwe i10,700 carats ze ndayimana – engabiza imali engange US$100 000 endaweni zomkoto. Lamadayimana wabanjwa lawo e Harare International Airport lapho ayencedisana khona lesinye isizalwane saphandle ukuwakhupha elizweni.
Esesitokisini uNhara ubikwa waloba incwadi encenga umongameli ukuthi angenele phakathi kwendaba yakhe aphiwe umthonisiswa ephandle. Kubikwa wavuma ukuthi yena ungomunye weqembu eligoqela iziphathamandla zikahulumende ezinkulu elidayisa amadayimana ngokungekho emthethweni. UMugabe ubikwa engaphendulanga leyoncwadi.
Intatheli le ichwayisisa ivumbulule ukuthi kulezikhulu zikahulumende ezithenga amadayimana legolide zilithengise phandle zincedisana lezinye izigangi zakwamanye amazwe. Ikampani le echwayisiswa ngamapholisa njalo eke yathintwa yileliphepha ngo February lonyaka ibikwa ithenga amadayimana legolide lomkoto.
Kulamapholisa kunye lamalungu elihlo likahulumende abaphatheke ekuthengeni lekuthengiseni la madayimana. Lenhlanganiso isuke yangenwa zimpehlane ezisuke za chaya uNhara egcekeni. .
“UNhara elobela u Mugabe wachaza ukuthi kuleziphathamandla zikahulumende ezinkulu ezithinthekayo kulenkohlakalo. Umsekeli kamongameli oqanjiweyo kulenkohlakalo ubikwa wazama kakhulu ukuthi ancedise uNhara aphume entolongweni. Amapholisa esechwayisisa avumbulula ukuthi lowo msekeli kaMongameli laye wayeyingxenye yamaganyana.Ukuchwayisisa kwahle kwaphelela khonapho.
Imizamo yokuthola inhlamvu zikamsekeli kaMongameli yaba njengokugida edwaleni, nanku anuthunqi thuli. Owesintwana owathi yena uyisisebenzi sewofisi kamsekeli wathi umsekeli uphakathi komsebenzi omkhulu ongamvumeliyo ukuphendula imibuzwana engatsholutho. Isikhulumeli samapholisa esithe singabethwa ngegama sithe leliqembu lezikliwi balibona kudala uNhara engakabotshwa. Kuthiwa kulolwazi olwafohlayo lwacina lusezandleni zamapholisa, into eyakhokhelela ekubanjweni kuka Nhara. Kulamagama aphezulu aphumayo. Akekho ozimisele ukutsha izandla. Kulindwe ukuthi lezi ziphathamandla zize zibanjwe sigavile, ukuthi hawu, yebo kambe bezincinda.
Iphupho lika hulumende ngenkomitsho yehlabathi
EHARARE
Injalo vele iZanu(PF). Iyathanda ukuqambula imikhosi ukwenzela ukuthi iziphathamandla zaya ezikhohlakeleyo zincinde.Okwamanje iziphathamandla ziphakathi kokuzama ukuthi ziphatheke ekuphathiseni abadlali beZimbabwe kumidlalo yenkomitsho yehlabathi ezabanjwa eSouth Africa ngo 2010.
Imibiko etholwe yi The Zimbabwean itshengisa ukuthi iziphathamandla okugoqela lezokwethekelelwa kwelizwe lezemidlalo ziphakathi kokudinga ukuthi zingancinda njani kulomkhosi.
U Governor weHarare uDavid Karimanzira utshele umhlangano kuviki ephelileyo ukuthi iZimbabwe ilungiselela ukuphatha i 2010 World Cup finals. Umhlangano lo ubanjelwe ewofisini ka Karimanzira eHarare njalo umbiko okhitshwe lapho utshengisa ukuthi yena lomphathintambo wezemidlalo batshele umhlangano ukuthi baphakathi kokulungiselela ukwakha inkundla zemidlalo ezintsha eChitungwiza, Mutare, Beitbridge, Masvingo le Victoria Falls.
Umhlangano lo utshelwe ukuthi iZimbabwe izaphatha eminye imidlalo kuleli njalo amaqembu eBrazil azabe ehlala eZimbabwe ephapha kuphela esesiyadlala. eMzansi.
Abakhangeleyo ngaloludaba bathi lokhu liphupho nje. Bathi iziphathamandla zisebenzela emnyameni.
Umphathintambo wemfundo lemidlalo uAeneas Chigwedere, elabonobhala nsika kungatsha zikahulumende babikwa sebebumbe ugatsha oluzakhangela ngokuqhutshwa kwalemidlalo ngo 2010.
Kungani kulokungazwanani kulandela eminye imibiko ephume nge Zimbabwe Tourism Authority. I Zimbabwe Football Association ithi layo yiyo emele amalungiselelo ale imidlalo njengoba kuyiyo elawula ezenguqu elizweni . Kubikwa sekulengxabangxoza , wonke umuntu esefuna ukufaka iminwe kulendaba. Ngulowo lalowo usefuna ukukhokhela amalungiselelo alomkhosi. .
Okwamanje abe FIFA babikwa besakhulumisana ngokuthi kambe iSouth Africa ingacela uncedo kubomakhelwane ukuthi bagcine izethekeli ezizabe zisiza emidlalweni. Umumo wezomnotho lokuthula eZimbabwe yiyo into ekhanya ukuthi izakuba lukhophe olukhulu. Umumo wezinto utshengisa ukuthi yikugula nje ukuthi iZimbabwe ithi ingakha ezinye inkundla zemidlalo.. Abakhangele ngalokho bathi iZimbabwe izama ukuziyangisa nje.
Impi yentengo yempahla idambisa imimoya ybazavota.
EHARARE
Umongameli Mugabe ubikwa etshele abasekeli bakhe lengcitshi zomnotho ukuthi babone ukuthi kuyini okungenziwa manje njengoba udaba lokukhwela kwemphahla lokusweleka kwezinto seludilize ilizwe.
Abaziyo ngezomnotho bathi akukho uhulumende angakwenza ngaphandle kokuthi avumele intengo ikhwele ifike lapho ezomnotho eziyitshovela khona.
Ibandla elibusayo lisenkingeni ngaloludaba lwentengo. Ibandla belikhangelele ukuthi ngokwehlisa intengo lizathola amavoti. Okwamanje kutshengisa ukuthi lizigwaze ngowalo umkhonto.
Abasekeli bakaMongameli u Joseph Msika lo Joice Mujuru babikwa bekade vele bengahambisani lokuphazanyiswa kwamabhizimisi ngaloludaba lwentengo.
UMugabe ubikwa esekhathele ngokuthi uzazikhupha njani kule nkinga asephakathi kwayo.
Abazi ngezombuso bathi ababoni uMugabe etshiya isikhundla kumbe ekhalala ukuncintisa kukhetho lukamongameli oluzayo ukuze kungene omunye akhokhele iZanu(PF) yena esaphila. Usenkingeni umdala lo.
Ukwehlisa intengo lokho kuphume lemivuzo ekade ingakhangelelwanga. Ukugcwalisa amashelufu ngempahla uhulumende ayethe uzakwenza akusenzakali.
Ukuphose ahluthunelwe umbuso kumnika umhedehede uMugabe
EHARARE
Ukufadalala kwezomnotho lokuma mazonzo kwezombuso kubikwa sekukhathaze uMugabe okokuthi useze wengeza ezomvikela emzini wakhe omutsha, njalo usehlezi eguqula abavileli bakhe ngesiphangiphangi.
Uvalo lwakhe lusuke lwabasobala kuviki ephelileyo eState House duze le Harare Sports Club lapho okukade kudlala khona iZimbabwe le South Africa ku One Day Internationals. Amapholisa kubikwa ukuthi ahlukuluza abantu kakhulu.
Abangaphakathi bathi uMugabe wayethuswe kakhulu ngumzamo wokumhluthunela umbuso oke wabakhona. Uzamile njalo ukuthi asebenzise amaphepha lomsakazo ukuthi athi yiBritain ebizame ukuhluthuna umbuso.
Kuselemibuzo mayelana lemfa yeziphathamandla zebutho ngemva komzamo wokuhluthunwa kombuso.
Kulemibiko ethi kulabacebisi bakaMugabe ababekhathazeka ngokungenzeka eZimbabwe abahamba bayabuza iziphathamandla zebutho ukuthi zingangenela njani uma umumo ungaba manzonzo. Lokhu kwafika kubi ezindlebeni zabasekeli bakaMugabe.
UGrace Mugabe ubikwa ukuthi uthi ukuguquka komumo kaMugabe kubesobala kusukela ngo March 11 lapho ibandla eliphikisayo libike ukuthi lizancintisa kukhetho lukaMongameli oluzabanjwa ngoMarch 2008.
Umhedehede wokhetho umkhulu bantu. UMugabe wethukile. Usongela kakubi iMDC. Useguqule lemithetho. Usehlasela abazamabhizimisi labakwamanye amazwe. Akasathembi muntu.
Umzamo wokuqila kukhetho uchaywe obala.
EHARARE
Ibandla le Zanu (PF) liphakathi kwamalungiselelo okuqila kukhetho oluzayo. Kulolukhetho akuthembisi ukuthi iZanu(PF) inganqoba ngaphandle kokuthi iqile.
UMongameli Robert Mugabe uzazama ukubhalisa abantu banye kuzigaba ezitshiyeneyo uma bengabasekela ibandla lakhe. Lokhu kuzakwenza ukuthi umuntu avote kanengi. Kumalungiselelo okubhalisa abantu abazavota bekulamabhasi abethwala abantu kundawo ezisekela iZanu(PF). Kuzakwenzeka ke lokho ngoba abantu abanengi sebefakwe emapulazini abangadabuki khona.Abantu abangu 500 000 sebephiwe izitanda emapulazini. Kulezigaba ezintsha esezicandiwe ezizanika iZanu(PF) amathuba.
UMugabe uzama ukuncinta MDC ngokusa abantu abangelamisebenzi emapulazini ahluthunwayo. Abanye emadolobheni bathenjiswa izitanda uma bezavotela iZanu(PF).
Ukuhanjiswa kwabantu emaphandleni uma bethe bavuma ukuvotela iZanu(PF) kuzayinceda iZanu. Lababantu bazaphiwa izindlu lezitanda uma bethe bavotela iZanu(PF). Bazahamba lamavoti abo besuka lapho abasuke khona.
Lo ngumzamo wokupha iZanu(PF) amathuba amahle kukhetho oluzayo. Lomzamo uzanyiwe eHarare waphumelela. Abantu abedlula i4000 bathuthwa bayabhaliswa endaweni zeZanu(PF).
Iziphathamandla zikahulumende zivumile ukuthi uMugabe kasoze ayekele amathuba esedlula. Uthe angeke ayekele iMDC ibusa.
Abesipholiseni e Morris Depot eHarare bathi amakhulukhulu ababengabalweli benkululeko baphakathi kokufundela umsebenzi kulungiselelwa ukubasa ezindaweni ezehlukeneyo kulungiselelwa ukhetho.
Post published in: News