News in Ndebele

(Violence soars despite Zanu denials)

EHARARE – Udlakela seluhle lwandulela ukhetho oluzakuba khona eZimbabwe kunyanga ezine ezizayo. Udlame osolumemetheke izwe lonke lubisa intandabuzo enkulu kakhulu  ekutheni kambe kuzakuba lokhetho olukhululekileyo na.

“Zimbi indaba. Uvuka ekuseni ungazi ukuthi nga lamuhla nguwe yini ozalandela nanku imbovane yeZanu(PF) iphakathi kokuqhuba udlame,” kutsho isakhamuzi seKambuzuma uBonnie  Nyamunda  ekhuluma le The Zimbabwean.

Noma iZanu(PF) yathembisa  kuzinkulumo ezakhokhelwa nguMbeki ukuthi udlame izalubeka phansi,abantu makhaza lokhu bephilela evalweni ngoba abethuseli bakahulumende  sebengezelele udlame elizweni.

Phezu kokuba ukhetho lolu lufanele lufakazwe ngamazwe omhlaba kunye lentatheli zehlabathi, iMDC  ithi uhulumende kathathe amanyathela okuqeda udlame.

Abacubunguli bathi uTsvangirai owacitshe wehlula uMugabe kukhetho olwedluleyo kungenzeka anqobe kukhetho oluzayo uma ukhetho lwakhona luyabe lukhululekile.

Umqondisi we Catholic Commission for Justice and Peace, uAlouis Chaumba, uthe: “Indlela udlame osolukhwele ngayo ayinhle. Ukwesaba abantu asebelakho kwenza kube lentandabuzo ukuthi ukhethjo luzabe lukhululekile.” – Ndunantatheli

I Botswana iqoqe imali enengi yokubuyisela amaZimbabwe ekhaya.

(Botswana invests millions to send Zims home)

KOBULAWAYO – AmaZimbabweans aseBotswana abhekane lodubo lokuhlala ehlaselwa ngamapholisa kulandela  ukuphuma kolwazi oluthi uhulumende wakulelo usebeke eceleni imali engange 21million  pula yokuthenga izimota ezinkulu ezingamatshumi amabili lambili zokuphindisela amaZimbabwe la azalwa khona.  

Iphepha le The Zimbabwean selivumbulule ukuthi uhulumende weBotswana usebeke izigidi zamapula  ezawasebenzisa ukwengeza ezomvikela  ukuze babambe amaZimbabwe ahlezi ngokungekho emthethweni.  

“Ugatsha lwezangaphakathi seluphiwe i 21 million pula yokuthenga izimota ezinkulu ezizasetshenziswa lugatsha lwe Immigration and Citizenship,” kutsho unobhala wezangaphakathi uMothusi Palai ekhuluma leBotswana Gazette kuviki ephelileyo.

Kuthiwa uPalai wathi umumo wezomnotho eZimbabwe ngenxa yokungabuswa kahle kwelizwe yiZanu(PF) usufike ebangeni elinzima kakhulu.” – Pindai Dube

Ukusweleka kwemali kukhweza inkohlakalo

(Cash crisis fuels corruption)

EHARARE – Ngesikhathi abantu sebetshona endwendweni zamabhanga bezama ukuthatha lanoma yi Z$5 million  izisebenzi zebhanga zibikwa sezibhadalisa abantu 20% yemali yabo uma befuna ukuyikhupha ebhanga ukuba bayisebenzise.  

“Ngiyayenza imali efika ku Z$70 million kulezinsuku. Noma nje lokhu kubuhlungu kwabanye abantu ngifisa ukuthi lumumo uke uqhubeke kancane kengizicebise lami,” kutsho omunye osebenzela ibhanga elikhulu.

IZimbabwe iphakathi kodubo lokusweleka kwemali nanku abamabhizimisi abasawathembi amabhanga akuleli. Lebhanga lesiwe lalo lifake imithetho enzima yokulondoloza imali.  

Imithetho emitsha yokuthatha imali ebhanga ethi ikampani ingathathi imali engaphezu kwe $40 million   kunye lokuwa komnotho weZimbabwe  sekubangele ukuthi abantu bagcine imali yabo ngendlela ezabatholisa inzuzo.  

Umumo okhona usufana xathu loka 2003 lapho uhulumende aze acina esesebenzisa ama bearer cheques ngoba kungasela mali. Lo ngumnyaka wesine ilizwe lingelamali.- Takesure Bizure

I Zanu(PF) izasebenzisa izigidigidi zamadola  ukucindezela amaphepha omkhankaso.

Trillions for Zanu election regalia

EHARARE – Ibandla elibusayo iZanu (PF) selibeke eceleni iZ$4.4 trillion (US$367 ) yokucindezela imibhalo yokukhankasela ukhetho oluzayo. Le yimali engathengela ilizwe amafutha ezimota okwenyanga egcweleyo.  

Abangaphakathi bathi  ugatsha olukhangele ngezemali  olukhokhelwa ngu David Karimanzira  seluvumile ukuthi leyo mali iphume. Uhlangothi lwabomama (Women’s league ) luzaphiwa  $1 trillion  nanku lusekele uMugabe  ngesikhathi sekulokukhonona okukhulu ngaphakathi kweZanu(PF) abanye besithi uMugabe makahlale phansi usekhulile.   

UKarimanzira  walile ukukhuluma phezu kwaloludaba ngempelasonto ethi  akakhulumi izindaba zebandla labantu bangaphandle.  

“IZanu(PF) izatholani ngokukhuluma lawe? Angikhulumi izindaba zebandla labantu bangaphndle,”- ZimOnline

Ibandla liyala ukuthi libhadalisa abantu ngenkani

(Party denies donation demands)

EMGUZA – Izakhamizi ezifa ngendlala eMatabeleland North kuthiwa zibanjwa ngamandla ukuthi ziphe iZanu(PF) izinkomo  lemali yokuqhuba umhlangano wayo omkhulu  ozakuba seHarare  kunyanga ezayo.  

Izakhamizi ezinengi ezikhulume le The Zimbabwean zithe inkokheli zabo zithe umuzi ngamunye ukhuphe i Z$100,000 Labo abalezifuyo bangakhupha lanoma imbuzi. Kuthiwa inkokheli zisongele ukuxotsha labo abangasoze bakhuphe lutho.  

“Saphiwa izingwalo zokuloba amagama azo zonke izakhamizi kusenzela ukuthi labo abayabe sebekhuphile imfanelo yabo amagama abo a gcizelelwe. Kuzafanela ukuthi lezingwalo kunye lesiyabe sikukhuphile sikuse enduneni.Izinduna zithi ziphiwe umlandu wokuhambisa okukhutshwe ngabantu eziphathamandleni zeZanu(PF). Satshelwa ukuthi lokhu kwenzeka kuzo zonke izigaba,” kutsho omunye umlisa  

Umphathintambo wezokuthengiselana u Obert Mpofu, ongumeli weMguza ephalamende uthe , “Lawo ngamanga aluhlaza. Akulanto enjalo.Uma izinduna zisenza lokho , hatshi ziyazenzela.  Abantu ababanjwa ngamandla ukupha . Silemali eyaneleyo yokuqhuba lowo mbuthano.Ngakho ke angikholwa ukuthi kulabantu ababanjwa ngamandla ukupha  iZanu(PF) izifuyo kumbe imali.”  

Umgcinisihlalo weZanu (PF) u John Nkomo walile ukukhuluma phezu kwaloludaba.. – Bayethe Zitha

Abacholi bempuphu sebeze bechola le rayisi.

(Millers move to mealie rice)

KOBULAWAYO – Abacholi bempuphu koBulawayo babikwa sebechola le rayisi kumzamo wokukhuthaza uhulumende ukuth abheke kakutsha  intengo yempuphu.  

Umgcinisihlalo wabacholi uTendai Musarara uthe abacholi akusekho abangakwenza.   

Abogatsha olukhangela ngenzuzo yabantu kunye  lentengo yempahla  balile ukukhuluma phezu kwaloludaba. – Pindai Dube