HARARE – Inhlanganiso ezizimeleyo zithi ukudla akusatholakali elizweni ngemva kokuba uHulumende abambe ngamandla osomabhizimusi ukuthi behlise intengo yempahla esezitolo.
Inhlanganiso lezi zithi isinqumo sikaHulumende sesidale indlala emangalisayo ezabelweni osekusenza unengi luphile ngezithelo langempande ezidliwayo.
Izigidi ezine zabantu beZimbabwe, phose ingxenye yesizwe sonke bakhangelane lendlala ecatshangelwa ukuth izabulala abantu.
Inhlanganiso lezi zithi ekuqaliseni komnyaka, imizi eminengi elizweni yayisele lokudla okwenela ukudliwa kunyanga eyodwa.
Kuncwadi eyathunyelwa kuntatheli zindaba, inhlanganiso lezi zathi: “Ukusilela kokudla sekudale ukuhlupheka phakathi kwabaswelayo njalo kuzalele abanye imali enengi.”
Abasebenzela lezinhlanganiso ezabelweni bathi izakhamizi seziphila ngezithelo zeganga ngenxa yokuswela impuphu.
Abantwana kuthiwa abasahambi ezikolo ngoba bekhetha ukuyadinga okuya ethunjini.
“Abaswelayo sebethengisa inotho lempahla yabo ukuze bathole okudliwayo.”:- Ngumlobi wethu Omkhulu
UMugabe usethembe amasalamusi, kutsho ingcwethi
HARARE – Ababona ngezombangazwe bathi umongameli welizwe, uRobert Mugabe usephelelwe ngamaqhinga nomanje ebopha inkani yetshongololo esithi ufuna ukungena kukhetho.
Bathi uMugabe uzangena kukhetho enjengebhiza elilenyawo ezintathu.
Usikwicamfundo uGerrald Fore osebenzela eUniversity of Zimbabwe uthi yena: “Nxa sicubungula okwenzakalayo, uMugabe usephelelwe ngamacebo lamaqhinga.”
Waqhubeka esithi: “UMugabe sekumele alwise njengesilo. Kodwa angiboni ephumelele. Usephelelwe.”
Inhlelo zikaMugabe zokukhankasela usekelo kukhetho kukhanya zingasasebenzi, kutsho abahlolisisa ngezombangazwe.
Ukuhluthunwa kwamapulazi okwakulobudlwangundlwangu kwadala indlala abantu balahla ithemba kuHulumende.
Ukwabiwa kwemitshina yokulimisa kukhanya lakho kungasoze kusebenze.
“UHulumende weZanu PF ubesithi lonyaka kuzatshaywa inkalakatha yenala kodwa abalamehlo bayazibonela ukuthi indwangu ikhuthe ugatsha . Bangala behlabela ingoma zabo emsakazweni wamaradio lama television ezokuthi kuzaba lenala, kuzadala inzondo engelamkhawulo ebantwini,” kutsho uRenson Gasela ingcitshi kwezokulima njalo eyinkokheli kubandla leMDC (Mutambara)
ULovemore Berejena, oweHarare uthi: “Okumangalisayo yikuthi akusensuku zatshwala singangenanga kukhetho kodwa uMugabe kakaqalisi ukukhankasela usekelo ebantwini. Lokhu kutshengisa ukuthi ixhegu liphakathi kwelitshe lembokodo. Ngiyaswela ukuthi abantu uzabatshelani ngesikhathi somkhankaso.”
Izakhamizi zeMurehwa, Mutoko leMasvingo zithi ukwabiwa kwenqola lamakhuba kuvule ingqondo zabo kwenza abantu babone ukwehluleka kweZanu PF. :- Ngumlobi wethu.
Post published in: News