“Lingesabi,uNkulunkulu Ulani”

Impumela yalolukhetho lamhlanje ayitsho lutho ngoba ayitshengisi intando yabantu baseZimbabwe. Impumela yalolukhetho ibonisa ukwesaba kwabantu baseZimbabwe.

Kungaze kwenzekeni, impumela yokhetho olwenzakala mhlaka 27 kuNhlangula ayisoze ihlonitshwe ngamazwe wonke. Bangaze baliphoqelele ukuthi lenzeni, siyazi okusenhliziyweni zenu. Lingafaki impilo zenu engozini. Unqobo lwabantu bangaluphuzisa kodwa ngeke baluqede.

Lanxa lingabe lihlezi ekwesabeni, yazini ukuthi umhlaba wonke ulikhangele. Umhlaba wonke ulalele. Umhlaba wonke ubukele njalo uyabona ukuthi uMugabe ucela abantu baseZimbabwe ukuthi balimaze, babulale, bathumbe amanye amaZimbabwe, kuyindlela yokuthi avikele ukuthi angaphumi embusweni.

Alilodwa lamhlanje. Amabandla alwela inkululeko eAfrica alizwile ilizwi lenu njalo balani kuloluhlupho olulokudelela inhloso esasiyilwela size sithole inkululeko. Abathungameli bentandoyenengi ilizwe lonke laseAfrica lomhlaba wonke jikelele kugoqela uMongameli uMandela, uArchbishop Desmond Tutu, kusiya kunobhala jikelele we United Nations , balugconile loludlame oluselizweni kusukela kukhetho lukamhlaka 29 kuMbimbitho.

Ngaphambilini ngike ngatsho ukuthi Qinani libe lezibindi. Ngiyakutsho kini futhi lamhlanje. Ngiyazi ukuthi inengi lenu lizaphoqelelwa ukuthi liyevota lamuhla. Ngiyazazi ezinye indlela abafuna ukuzisebenzisa ukuthi balethusele ukuze bathi banqobile kulolu khetho oluyinhlekisa.

Njengesibonelo, siyakwazi ukuthi abanye benu litshelwe ukuthi libhale phansi inamba yephepha elizavotela kulo ukuze benelise ukuthi baqondanise babone ukuthi livotele bani. Nxa kuyikuthi kumele ukwenze lokhu ukuze ungabulawa, ungesabi, kwenze.

Siyakwazi njalo ukuthi bathi bazafaka amakhamera lapho elizavotela khona ukuze amamilishiya abone ukuthi livhote njani ukuze balijezise nxa livotele mina.Lingesabi.Abalawo lawo makhamera.
 
Siyakwazi ukuthi bathi bazalibulala nxa iMDC ingathola amavoti. Kungakho kunzima ukuthi sithi thina lingesabi, ngoba siyabazi ubuhlungu elibuzwayo. Kulokhu sithi, siyakwazi ukuthi lifuna utshintsho. Utshintsho luyeza. Lingalahlekelwa lithemba. Ku’zwe lonke laseAfrica lakulabo abazohlola lolukhetho, sithi impilo yabantu bethu isezandleni zenu.

Nxa bengalethusela besithi uma iMDC ithola amavoti alitshumi, kuzokufa abantu abalitshumi – lingesabi- njengoba uJesu esithi, lingesabi. Votani okumele likuvote ukuze lisale liphila.

UNkulunkulu uyakwazi okusenhliziyweni zenu. Lingafaki impilo zenu engozini.

Ye, kungenxa yalokhu kuhlutshwa lalesi senzo esiyangisayo okwenze saphuma kulolu khetho.

Ngiyaphinda njalo ngithi, Bakwethu eZimbabwe, siyakwazi okusenhliziyweni zenu. Siyakwazi ukuthi lifuna utshintsho olulokuthula. Lingafaki impilo zenu engozini. Nxa bengaliphoqelela ukuthi livotele uMugabe ukuthi lingalinyazwa, lingesabi, mvoteleni.

Siyakwazi futhi ukuthi lizimisele kumbuso wentando yeningi. Siyakwazi ukuthi selifuna ukubisela isithunzi sengatsha zikahulumende ezifana lamapholisa, amasotsha lama CIO . Siyakwazi ukuthi lifuna ukudla, imfundo lemisebenzi. Siyakwazi ukuthi lifuna ukuthula lempumelelo.

Nxa kusenzeka siyalicela ukuthi lingayivota lamhlanje. Kodwa nxa kumele livotele Mugabe ukuze lisindise impilo zenu, yenzani njalo.

Noma kungabe yini abaliphoqelela ukuthi liyenze, siyakwazi ukuthi lifuna iZimbabwe entsha lokuqala katsha. Ungabe usebenza noma ungasebenzi, umdala loba umncane, uyindoda loba ungowesifazane, usesesikolo loba ungumzali, ukubutho noma hatshi- siyakwazi ukuthi lonke lifuna unguquko. Inguquko elokuthula.

Kungaze kwenzakaleni, Bakwethu, akekho umuntu olamandla engelabantu abamsekelayo. Kungela bantu, amandla ayaphela. Njengoba iAfrican National Congress Freedom Charter isitsho, akula hulumende ongathi unqobile okusemthethweni ngaphandle kokuthi kube kuyintando yeningi. Sekusele isikhathi esincane ukuthi lowo obusa okungekho emthethweni alahlekelwe ngamandla, ngoba amandla ngabantu
Intando yabantu izakuvezwa
 
Movement for Democractic Change Head Office
Harvest House, 44 Nelson Mandela Avenue, Harare,  Zimbabwe Phone: +263 4 780 301-3, Tel/fax: +263 4 780 301-2
www.mdc.co.zw