Incwadi ekhitshwe yinhlanganiso yababalisi ye Progressive Teachers Union of Zimbabwe uthi ababalisi ikakhulu emaphandleni bahlukunyezwe kakhulu kusukela ngomnyaka ka 2000.
Iveze njalo ukuhlukunyezwa okwenziwe yizikliwi ze Zanu (PF), abalwela inkululeko, labasesibuthweni, kulo lonke ukhetho. Abanye ababalisi baze babaleka ezikolo ngokwesabela impilo zabo.
“Ukwethuselwa lokuphoqelelwa ukuya emihlanganweni yombangazwe kuphuma phambili, kodwa ukutshaywa, ukuhlikilizwa, kunye lokwalelwa ukuvota lakho kubaliswe kakhulu,” kutsho incwadi le.
Lincwadi ikhuthaza uhulumende ukuthi alele amabandla ezombangazwe ukukhankasela ezikolweni, ithi ababalisi bahlukuluzwa ngoba bebonakala bengabamabandla aphikisayo kumbe bengasizi iZanu (PF).
Ingxenye yababalisi ithe izabaleka njalo ezikolo zemakhaya uma loludlame lungabuye lujike.
IZanu (PF) isike yakuphika lokho ngaphambilini.
Ngokwale incwadi, ababalisi bazikolo zase Muzinda le Machiva e Zaka batshaywa kakhulu phambi kokhetho lwesibili lukamongameli ngoNhlangula ka 2008, besetheswa umlandu wokukhankasela u Morgan Tsvangirai.
“Omunye wababalisi walimala kakhulu waze wayalaliswa esibhedlela sase St. Antony,” kutsho lincwadi.
Lincwadi ikhuthaza ukuthi kudingwe indlela zokuvikela izikolo lokulimukisa ababalisi. Izikhulumi zithi udlame osoluqalile njalo, kuhlanganisa lokubulawa kuka Sharukai Mukwena we MDC eZaka ngoLwesibili olwedlule kubonisa ukuthi ukhetho oluzayo luzavuza igazi.
Post published in: News