‘‘Izikhonzi ze EU zisola kakhulu ukukhuphuka kodlame lwezombangazwe kwele Zimbabwe ngemva kokuvakatsha kuka Pillay, okulandele isicelo kuhulumende wase Zimbabwe ukuthi amise udlame lolu,” kutsho iEU kuliviki.
I EU ithe abayisikhombisa be MDC-T “batshaywe kakhulu batshiywa befuna usizo lwabongi”, kukanti omunye wabakhokheli ubuye wabulawa emhlanganweni waleliqembu eChimukoko, eMudzi mhlaka 26 ngo Nkwenkwezi.
U Cephas Magura (58) wabulawa ngenyanga edlule ngabantu abacatshangelwa ukuthi bangabe Zanu (PF) abaqhamuke kulo umhlangano bengamenyiwe.
‘‘Imibiko ithi umhlangano ubusemthethweni kodwa waphanjaniswa ngodlame lokubhikitsha kwabantu be Zanu (PF) emaceleni, kukanti amapholisa abengelasifiso sokungenela kulokhu.
‘‘Iyakhathaza imibiko ethi abakhulu be ZANU-PF kuleyondawo lomela loyimela ePhalamende babekhona kusenzakala lokho,” kutsho omunye wabe MDC-T.
I EU isola kakhulu uhulumende ngokwehluleka ukupholisa loludlame, kodwa ijabulele ukuthi amabandla onke ezombusazwe alusolile loludlame.
‘‘Siyakujabulela ukuvuselelwa kwe JOMIC kulesisabelo kunye lokubotshwa kwaba yisithupha abasolelwayo. Izikhonzi ze EU zikhangelele ukuthi kuthathwe amanyathela afaneleyo ngamapholisa kunye legqwethakhulu lika hulumende ukuze kuphele loludlame,” kutsho i EU.
Post published in: News