Marara ezvicherwa zvavo aya anonzi ari kukonzera hurwere muvagari venzvimbo iyi pamwechete nemuzvipfuyo zvavo, kunyangwe zvapo pasati pave nekutsigirwa kweizvi nevatauriri vanomiririra nzvimbo iyi.
Makurukota anomiririra European Union akanga akatungamirirwa nemumiririri WeEU VaAldo Dell’Ariccia vakashanyira nzvimbo yeMarange mumasvondo apfuura vakaratidza kutsutsu-mwa maererano nenhau dzekukanganiswa kwenharaunda muhurukuro dzavakaita nemumiririri weManicaland VaChris Mushowe.
Sangano reEnvironment Management Authority (EMA) rakaita musangano wechimbi- chimbi naVaMushowe mushure mekunge sangano iri razivisa kuti rine hurongwa hwekudzivisa kambani yeAnjin kuita basa munzvimbo iyi nemhosva yekutadza kutevedza mitemo yekuchengetedzwa kwakanaka kwenharaunda.
“Tiri mubishi rekuongorora maitiro ari kuitwa basa rekuchera zvicherwa. Mvura ine tsvina inofanira kucheneswa pachinzvimbo chekurasirwa munzizi.Mumwedzi wega-wega, ndiri kutambira ongororo dzinenge dzaitwa neEMA dzichindiyeuchidza kuongorora kuparadzwa kwenharaunda nekuona kuti zvisaenderere mberi,” vakadaro VaMushowe mumusangano uyu.
Asi vagari venzvimbo iyi vakapa Anjin mhosva yekusvibisa mvura. Vakati vazhinji vavo vakatanga kuita matambudziko akanyanya maererano nehutano hwavo mushure mekunwa mvura kubva munzizi idzi sezvo Anjin yaive yatanga mabasa ayo ekurasira tsvina yezvicherwa zvayo munzizi idzi muna 2009.
Mukuru mukuru pavagari venzvimbo iyi, VaAleck Mutsago vakati mumasvondo matatu apfuura, vakarasikirwa nemombe dzavo nhatu mushure mekunge dzanwa mvura murwizi Odzani.
Mumwe mutauri anoshanda ari musangano reEMA, akataura nechikumbiro chekuti zita rake risaburitswa akati makambani mazhinji anoita zvekuchera zvicherwa anoona zvakareruka kuterera miripo yekusvibisa nzizi pamwe nenharaunda pane kushanda maringe nenzira dzinochengetedza nharaunda.
Mukuru- mukuru muAnjin, VaMunyaradzi Machachi vakabvuma kuti pane tsvina inobva mukuchera kwavo ngoda yakapinda murwizi urwu mushure mekunge imwe yematangi avo yaita dambudziko.
“Mumashandiri edu emazuva ose, mvura inobva murwizi Odzi inocheneswa kwete kudzorerwa murwizi ine tsvina. Rimwe rematangi edu rakaita dambudziko mumasvondo apfuura, asi takarigadzirisa,” vakadaro VaMachachi.
Zvichakadaizvi, vanoona nezvekuchengetedzwa kwakanaka kwenharaunda nevanoona nezvehutano vari kukakavara kuti makambani aya haasi kutevedza mitemo yekuchengetedzwa kwakanaka kwenharaunda vakati panofanira kuva nemutemo wakasimba wekusunga vanenge vapara mhosva idzi.Vakati “Panofanira kugadziriswa.
Hatingapeti maoko tichirega nharaunda dzichiparadzwa nemakambani aya,”vakadaro VaMike Pullen, vanoona nezvenharaunda.
Post published in: News