Lokhu kungadala ukuthi izindlu ezinengi zibhidlizwe ukuze kulungiswe loludaba ngendlela eyiyo. Abaphathi bedolobho le Chitungwiza abebekhokhelwa ngosexotshiwe obengunobhala wedolobho leli, u Godfrey Tanyanyiwa, kubikwa bephisane lomhlaba wokwakhela izindlu ezedlula itshumi lanhlanu lezinkulungwane ngokungaphandle komthetho.
Abahlali balindawo bakhathazekile ngokuthi iqula lenze uphenyo lwalo bengaziswanga njalo bavumile ukuthi sebesesabela ukubhidlizwa kwezindlu zabo.
Umfelwakazi oleminyaka engamatshumi amahlanu lasithupha obephiwe indawo e Seke Unit J, uthe kasazi ukuthi woneni ngoba phela wathenga umhlaba lo mathupha.
“Kubuhlungu ukuthi bona kanye labo esabakhetha ukuthi basimele sebesiphatha njengezikliwi. Lapho ngithola indawo le ngangithemba ukuthi ngilandele indlela zonke eziqondileyo ngoba osomawofisi bakasodolobho beza bazokuphawula lokho ngezincwadi ukuthi kangihlale lapha,” kutsho lowo.
“Manje sengisizwa kuthiwa iqula likaMbedza lizayibhidliza indlu yami ngoba ayikho emthethweni, ngiyephi pho?”
Umhlaba akhele kuwo indlu yakhe elezindlwana ezinhlanu kufanele ibe ligceke lokudlalela umphakathi.
“Okumangalisayo kakhulu yikuthi labo abenza ubukliwi bonke lobu bazihambela ngokukhululeka ngoba inkantolo ibapha izijeziso ezingatsho lutho kukanti imali zethu ziyachitheka ngezenzo zabo,” kutsho uMama Welly, omunye njalo wabahlali.
UDonald Magwenzi wase Zengeza 4 yena ukhuthaze uhulumende ukuthi ajezise kakhulu labo abenza ubukliwi lobu ukuze ethuse labo asebengenza ngokufanayo.
UMbetsa yena uthe usodolobho akalawo umlandu wokuhlawulela impahla lapho zingabhidlizwa, wabuye wathi labo abakhele emhlabeni ongavunyelwayo bazophathwa njengezigebengu.
Post published in: News