UDenga uthe intsha le isibuyisele emuva inhlelo zakhe ezinengi ukuze igama lakhe lingcoliswe phambi kokhetho oluzayo.
“Bafisa ukumisa inhlelo zentuthuko eMbare ukuze kukhanye angathi iMDC siyehlulekile emphakathini. Zinengi kakhulu inhlelo esengize lazo lapha ukuze nginakekele abantu, kodwa inengi lazo zabhidlizwa yiChipangano,” kutsho uDenga.
“Eminye imigodi yabhidlizwa kukanti sithe nxa sithuma abantu ukuthi bayeyivusa baxotshwa. Okwethusa kakhulu yikuthi iMbare isafuna ukuvuswa kakhulu, kodwa intsha le ivimba inhlelo ezingasiza ukuthuthukisa impilo zabantu.”
Uthe njalo ukuthatha uhlangothi lwezigangi kwamapholisa, ema nje abheke lapho iChipangano isona santando kuyethusa kakhulu.
UDenga useke watshaywa yintsha le eMbare ngemva kokuba ehambe ukuyabona ukuthi abantu bahlala kanjani emafulathini asindwa ngamanani, kukanti wethuselwa langokubulawa.
“Angisakhuselekanga nxa ngihamba endaweni engiyimelayo, kukanti kufanele ngivakatshele abantu ukuze ngizwe izikhalazo zabo. Kunengi okufanele kwenziwe, kodwa iChipangano yenza kubenzima lokho.”
Usole njalo ukubhadaliswa kwabathengisayo imali engange $1 ukuze baqhubeke ngomsebenzi wabo lokuthi bathenge amakhadi e Zanu (PF).
Post published in: News