Uhulumende usanda kubeka imali yabalimi phakathi kwamasenti angamatshumi ayisikhombisa kusiya kwangamatshumi ayisitshiya ngalombili, kodwa abalimi abanengi bathi amankampani amanengi abathembisa amasenti angamatshumi amathathu lanhlanu kuphela.
Endaweni yokuthengisela utshinda, ye Mudzimu Cotton Depot, eHurungwe, abalimi abanengi abasithengisi isilimo sabo, ngoba bekhulekela imali engcono ezobaphilisa.
Abalimi botshinda babhekane lokuthengiswa kwempahla zabo uma bengehluleka ukukhokhela izikwelede zabo kuhulumende lamabhanga. Imininingwane ithi abakweledisi baphe abalimi imali engangamakhulu amane ezigidi zamadola okulima utshinda, okufanele baluthenge kubalimi.
Ukuwa kwemali yotshinda emhlabeni, kunye lokwehla kokufunakala kwalo emkambo emikhulu njenge China, sokwenze intengo yalo yehla kakhulu lakuleli.
Umgcinisihlalo wenhlanganiso yabalimi ye Zimbabwe Farmers Union Cotton Producers Association, uJoseph Gondo, uthe abalimi sebeze bephoqelelwa ukuthi bazitholele abathengi abazimeleyo, kukanti umsekeli wakhe, uBerean Mukwende, uthe umumo lo usuhlukumeze kakhulu abalimi wabuye wa buyisela emuva uhlelo lokulima kuleli.
“Sesikhulume labahlubi, abathe abanelisi ukubhadala ngoba intengo yehle kakhulu, kodwa abalimi abakulaleli lokho,” utshilo.
Umgcinisihlao we Cotton Growers and Marketers Association, u Morris Mukwe, yena uthe abalimi babeke amathemba abo emhlanganweni wabo labe Agriculture
Marketing Authority ozayo.
Kusenjalo, abalimi botshinda eBindura sebekhathele ngesilimo lesi. Inengi babo seliyeke ukulima utshinda, kukanti abanye njalo sebefuna ukukhalala ngenxa yokwehla kwentengo.
Post published in: News