Amapholisa ayathengwa ngokufa kukaMujuru

Umgcinisihlalo webandla le MDC-T enkaba-Mashona, u Godfrey Chimombe, uthi amapholisa amthembise imali ukuze abaphe imininingwane mayelana lokufa kowayengumlawuli wamabutho, uSolomon Mujuru.

UMujuru wafa ngendlela esolisayo epulazini lakhe le Beatrice ngoncwabakazi wanyakenye. Uphenyo ngalokhu kufa solwehlulekile ukuveza ubufakazi bokuthi wadliwa yini.

Umongameli uRobert Mugabe laye usebonise insolo ngokuthi uMujuru wafa etshiswa ngumlilo, kukanti imuli yomufi yona isithe makube lophenyo olukhulu ngokufa kwakhe.

U Chimombe wabotshwa kumaviki amabili edlule ngemva kokuba ethe umfelokazi walindoda, umsekeli-mongameli Joice Mujuru, wazi kahle ngalokho okwadla umyeni wakhe. Uyaliphika icala, kukanti utshelel leliphephandaba ukuthi amapholisa asenkambeni ye Bindura amvalele okwamahola ayisithupha embuzisisa.

“Ngavalelwa endlini encinyane lapho amapholisa ayisikhombisa angibuzisisa ngembali yempilo yami. Angibuza njalo ukuthi kungani ngangena ebandleni leMDC, abuye alulaza iwofisi kangqongqotshe kahulumende, uMoragan Tsvangirai. Esebona ukuthi angiqgize qhakala, angithembise i$15 000 ukuze ngiwaphe imininingwane ngalowo owabulala u Mujuru.

“Amapholisa angethese icala kunye labo bonke abeMDC, lokungamhloniphi uMujuru oseleyo,” kutsho uChimombe.

Uchimombe, omela iShamva yangeNyakatho edale lephalamende uphume nge$200 wabuye watshelwa ukuthi aziveze emapholiseni ase Madziwa ngalo lonke uLwesihlanu.

Post published in: News

Leave a Reply

Your email address will not be published. Required fields are marked *