U Rufuse, owasila mhla kuhlaselwa inkamba yase Chimoio, kwele Mozambique ngomnyaka ka1976, wayengomunye wabakhulu be Zanu (PF) esiqintini sase Mutare. Watshiya lelibandala wayangena kwele MDC-T ngomnyaka ka 2008.
Nyakenye, wahlaselwa ngabanye ababengabalweli lentsha yeZanu (PF) ngesikhathi kuhanjelwa isisekelo esitsha sombuso, ngoba kuthiwa ukhulume kabi ngezimiso ze Zanu (PF) zokubamba ngamandla izakhamizi ukuthi zisekele imibono yalelibandla.
“Kunyanga ezimbili ezedlule, abentsha le yangethesa umlandu wokuba ngumthengisi. Ngabatshela ukuthi angisafuni kubandwa kanye le Zanu (PF), kodwa bethusela ukutshisa umuzi wami nxa ngingalandeli imilayo yabo. Ngaphoqelelwa ukungena imihlangano yabo,” uRfuse utshele iphephandaba leli le The Zimbabwean.
“Ngihlala esihogweni lapha. Bahleli bebhekane lalokho engikwenzayo. Kwesinye isikhathi bazakhela imishasha endlini yamo. Besaba ukuthi ngingaxwayisa abanye ababengabalweli ukuthi beqele kuMDC.” Umlweli lo, ogama lakhe lempi lalingu Cde Groundforce, ulendaba ebuhlungu yokukhuluma ngayo.
“Ngalwa ngabuye ngasila ekuhlaselweni kwe Chimoio. Ngaya empini ukuze ngikhulule lelizwe. Linengi igazi elachithekayo, kukanti inengi lafa, kodwa namhlanje abanye abantu abazenza ababe ngabalweli sebephethe izilzwe. Bonke labaya obabona phezulu ku Zanu (PF) ngabamanga. Abalilwelanga, kodwa bazenza amaqhawe. Bheka, namhlanje ngingumyanga wokugcina, kodwa ngakhulula ilizwe leli. Sasetshenziswa ngamaqili la aku Zanu (PF). Banengi abalweli abaphila ngokuhlupheka njengami.
“Njengoba sisiya jabulela ikhefu lamaqhawe, ngifuna ukuthatha lelithuba ukutshela umhlaba ukuthi abalweli boqotho bakhathele nge Zanu (PF) ngoba igcwele ognqeqe lamasela. Ngahlukunyezwa ngodlame lomnyaka ka 2008 njalo ngisaphila ngokwesaba. Lanxa besiphila ngokuthula ngemva kukahulumende womanyano kaNhlolanja ka 2009, udlame lokwesaba kujikile njalo. Sengibatshele ukuthi bangiqedise ngoba vele sengifile njalo angiseyinto yalutho.”
“Intsha le yabulala yeba inkomo zami ngoba sengingowe MDC-T. Izihlobo zami sezingibalekele ngoba zisesaba ukufa. Knodwa ngizimisele ukufa ukuze kulunge izinto kuleli. Aluba bephelele, bebengeba inkomo babuye babulale abantu abafana lami, abangamaqhawe?
“Manje sebeqale imihlangano yabo eminengi lapha, abangiphoqelela ukuthi ngiyingene ngibuye ngiphawule kuyo. Bangibamba ngamandla ukuthi ngithwale abasekeli babo ngemota yami. Bathi ngizoxwayisa abanye abalweli ukuthi bangene juMDC-T. Abantu balindawo bayangihlonipha ngoba ngalwela ilizwe. Ngidumile ngoba ngihlala ngikhuluma iqiniso.
“Kubuhlungu ukuthi i Zanu (PF) imadabudanu ngenxa yezimiso zayo ezimbi. Lokhu akusikho amaqhawe akufelayo. Inengi lethu liyasokola, kodwa abaphezulu bazikholisela imiselo yezithukuthuku, igazi lezinyembezi zethu. Bheka, ngilamanxeba empi njalo banengi abanjengami. Umuntu owalwela impi yoqobo ngeke asekela iZanu (PF).”
Post published in: News