Lokhu kuvezwe lugwalo olutsha olubalisa ngempilo yabanthwana abadukileyo emadolobheni ase Harare, iGweru kunye leBulawayo. Luncindezelwe ngabe Southern Africa HIV and Aids Dissemination Service
“Osomabhizimusi base Gweru sebeqale umkhuba wokupha abantwana abadukileyo, ikakhulu asebethe thuthu, imisebenzi, hatshi ukudla. Ngezikhathi ezinenhi imisebenzi le iyabe ingeyokuthwala impahla zabo. Abanye abantwana laba sebehambe besuka eHarare, kwaBulawayo, eZvishavane kunye leMutare,” kuveze ugwalo lwe SafAids.
UTariro Moyo, ongumhlali walelidolobho, utshele leli phephandaba ukuthi ukwanda kwabantwana laba sokubadalele ingxabano labahlali abaphila ngokuthwala impahla.
‘‘Sokwande ukulwa phakathi kwabantwana laba lalabo abaphanda ngendlela efanayo kulindawo. Abalapha bathi abantwana laba babathathela imisebenzi,” kutsho uMaMoyo.
Wengeze wathi abantwana laba bazikhethela ukuchitha yonke imali etshwaleni, ugwayi kunye lengcino yezicathula abayihotsha njengesidakamizwa. I SAfAIDS yona ithe abadukileyo banda kanje ngenxa yokubhidlika kwemindeni, ubuyanga kunye lokumemetheka kwengculaza, phakathi kokunengi.
Abe Consortium for Street Children, bona bacabangela ukuthi sebengaba zinkulungwane ezilitshumi lambili abantwana abadukileyo kuleli, kukanti abazinkulungwane ezinhlanu bahlala esigodlweni.
Abe Streets Ahead, inhlanganiso ezama ukusiza ngezenhlalakahle yabantwana abadukileyo, bathi inani liphezulu kakhulu kulalelo elibalisiweyo, ngoba beloba abantwana abatsha abangamatshumi amabili abafuna usizo kubo ngenyanga.
I SAfAIDS iphezu kokumisa uhlelo lweminyaka emithathu oluzama ukusiza abantwana laba ngemfundiso zocansini ezivikelekileyo.
Post published in: News