UChinotimba ungomunye wabasebenzela iZanu (PF) njalo bekhangelele ukukhuphuka ngezombusazwe. Kubikwa ezama ukusebenzisa umumbu ukuze anqobe kukhetho ngomnyaka ozayo.
Intsha le kubikwa izondiswe kakhulu yibukhohlakali benkokheli zalelibandla esabelweni lesi, abalomlandu wokupha ukudla.
“UChinotimba usitshele ukuthi uphe amathani alitshumi omumbu, kodwa sibone nje omlutshwana kakhulu,” kutsho enye indoda ezibize ngo Brian Chapanduka.
Ngeonzondo, intsha le yethusele yathi izakuyangena kubandla le MDC.
“Sibatshele ukuthi sizakhetha u Tsvangirai kukhetho oluzayo bangaqhubeka ngobukhohlakali babo,” kutsho u Chapanduka.
U Chinotimba yena uthe ubengazi lutho ngokwenzakeleyo, lanxa nje evumile ukuthi uhambise umumbu lowo otshiwoyo ukuze utholwe ngabantu abavela endaweni ezintathu.
“Sihambise amathani alitshumi, okutsho ukuthi wonke umuntu bekufanele athole,” kutsho uChinotimba ngomakhalekhukhwini wakhe, qede wamcima.
Kubenzima ukuthola lapho umumbu ka Chinotimba ovelele khona, kodwa kulemibiko ethi amalunga eZanu (PF) asebenzisa izikhundla zawo ukuze abuthe umumbu kahulumende wokupha abalambayo, ukuthenga amavoti kuzakhamizi.
Omunye umsiki webunda kulesi siqinti uthe labo abafanele baphe abantu umumbu bawubambe ngabomo ukuze babonise uChinotimba njengomqambi wamanga.
“Bakwenzela ukumulalaza ebantwini ngoba evimbela amanye amalunga ukumelana laye kukhetho lwe Zanu (PF) lokuthola lowo ozayimela ngomnyaka ozayo.”
U Chinotimba wazakala njengesikliwi kusukela ngomnyaka ka 2000 lapho abeyisigijimi esilodlame ngesikhathi kuthathwa amapulazi.
Wathola inotho ngesikhatshana esincinyane, lanxa isisusa saleyomali sisavalwe yinkungu lanamhlanje. Phezu kokuthumba amapulazi, u Chinotimba wabuye wahlasela amankampani, lapho asenga khona imali kubaniniwo ayebethesa umlandu wokuholisa izisebenzi imali encinyane.
Post published in: News