Utsho lokho ngemva kokuba u Mutambara ale ukulandela ukulawula kwe SADC lapho ithe ehle esikhundleni sakhe kuhulumende womanyano. I SADC, mhlanganweni wayo we Maputo odluleyo, ithe ayisamboni njengomunye wabomaqhuzu uMutambara, kodwa yena umba phansi ethi ngeke akulandele lokho.
U Mutambara lo, oke wakhokhela ibandla leMDC elincane eseliphethwe ngu Welshman Ncube, wakhitshwa esikhundleni emhlanganweni wokukhetha owabanjelwa koBulawayo nyakenye. Uzama ukukulwisa lokho edale eliphezulu.
Abebukeleyo bathi umaqhuzu kufanele abe elebandla alikhokhelayo phakathi kwamathathu acindezela isivumelwano sokulawula uhulumende womanyano ngo 2008 okwalandelwa nguhulumende owadalwa ngo 2009.
U Biti uthe uMutambara mubi kuloMugabe ngoba uzama ukwalela esikhundleni salelibandla yena engazange ame kukhetho lwangomnyaka ka 2011.
“UWelshman Ncube wakhethwa ngumhlangano u Arthur Mutambara anagazange amele ukhetho kuwo. U Mutambara kazange aze amisane loNcube njalo ngabona umbono lapho UMutambara atshayela khona uNcube ihlombe ngemva kokhetho. Kuyangihlupha lokho njengomuntu ngoba usendo lwethu alungelandele lokho okwenziwa yi Zanu (PF). Sengitsho loMugabe uyakulwela ukwamukeleka ngokhetho. Awungezibize ngenkokheli yebandla wena ungamanga kukhetho lwalokho. Akwenzakali lokho,” kutsho uBiti.
U Mutambara yena uthi kufanele ahlale engumaqhuzu, kukanti wethesa isithunywa se SADC kuleli, umkhokheli, ongumongameli weSouth Africa, u Jacob Zuma, icala lokusebenzelana lokukhitshwa kwakhe esikhundleni.
Indodakazi kaZuma ingumalukazana ka Ncube. U Biti ukubize ngamanyala lokho, wathi uMutambara wakhafulwa libandla lakhe. “U Zuma wayengekho emhlanganweni we MDC ngoZibandlela nyakenye. Akusuye owakhetha u Ncube. Ngamanyala lawo,” kutsho uBiti.
Post published in: News