Ekhuluma ngocingo ekoBulawayo, umnumnzana Coltart, uthe abakuleli kufanele bayeke ukwahlukanisa ukhetho lwamabandla aphikisayo njengalokho okwenzakala ngomnyaka ka 2008, lapho amabandla la ehluleka ukuvumelana ngodaba olufanayo. Ucele inkokheli zamabandla ehlukile aphikisayo ukuthi zibeke eceleni ubuhwaba lomina zisebenzele imbumbano ezathathela uMugabe umbuso asehlale kuwo kusukela ngomnyaka ka 1980 ilizwe lithola uzibuse.
“Umbono wami ngothi asingevumele into efana leka 2008, lapho iZanu (PF) eyavuna khona ukwehlukana kwamabandla aphikisayo. Ngilethemba lokuthi onke amabandla atshayelwa yintanto yenengi azasinanzelela isidingeko sokusebenzelana ndawonye ukuze kusuzwe iZanu (PF),” kutsho uColtart.
Ebuzwa ukuthi kambe nga ungqongqotshe kahulumende, uMorgan Tsvangirai, engabe enguye okufanelwe kumanyanwe ngemva kwakhe, oka Coltart uthe umbono kufanele uvele kuwo wonke amabandla aphikisayo ngemva kokukhulu ukucubungula lokukhulumisana. Uthe njalo ulenhlonipho enkulu kuTsvangirai, owesabisa uMugabe okwamagama.
“Ngiyamhlonipha kakhulu u Tsvangirai ngesibindi lokuzimisela asekubonise kuMDC imisana le Zanu (PF), kodwa angiboni sengani kulilungelo lami ukumkhetha ukuthi abe nguye ummeli. Lokho kungaphuma kumabandla onke.”
Uthe yena, kakuboni kusenzeka ukuthi amacala omabili eMDC ahlangane ngoba esehlukile kakhulu ngemibono kwezokubusa ilizwe, kodwa wengeza ukuthi kusengenzeka ukuthi enze umanyano lwesikhatshana oluphela ngemva kokhetho.
“Kwezombangazwe konke kuyenzeka nxa kukhulunywa, kodwa kufanele sibheke lokho okungasebenza lokungeke ukuze izinto zibe lula kithi sonke,” kutsho u Coltart, othe uyakhathazeka kakhulu ngokuqhekezeka okwadala ukwahlukana kwe MDC, osokube yisipho ke Zanu (PF).
“Kungaleso sizatho ukuthi ngasala ngiyimi ngedwa wabasunguli be MDC owasala engathathanga hlangothi ngesikhathi kusahlukana indlela. Ngangifuna ukubambanisa amacala omabili, kodwa ngemva kokubona ukuthi akusenzeki, kwafanela ukuthi ngithathe inyathelo,” kutsho yena njalo.
Uthe yena ke wakhetha ukuthi aqonde phi ngemva kwenyanga eziyisitshiya ngalombili ngemva kokubona ukuthi akusela kuhlanganwa. Wakhetha ukuhamba lecala elincinyane ngoba lona belingaluthandi udlame njengalelo elika Morgan Tsvangirai.
Wengeze wathi ubone njalo ukuthi abantu abamkhuthaza ukungena kulelibandla, abagoqela uGibson Sibanda, bebekucala leli elincinyane. Uthe njalo abantu bangathatheki ngokuthi umahluko wadalwa yikungena kumbe ukungangeni edale lephalamende eliphezulu ngoba lindaba inde kakhulu kulalokho.
“Lokho kube yimbonela ngaphandle ngoba inkulu lendaba. Besilembono ehlukileyo yokulwisana le Zanu (PF) njalo lanxa besivumelana ngaleso sikhathi, bekukhona impimpi zikahulumende ezinengi ebandleni ebesezidala ukulwisana njalo besokuyingxabangxoza,” kwengeza uColtart.
U Coltart uthe inengi ku MDC belingakhangelelanga ukuthi uhambo lokukhipha iZanu (PF) embusweni luzathatha isikhathi eside kangaka, baya bakhathala babuye baphelelwa ngamandla lesineke.
“Besesilwe okweminyaka eyisithupha, kukanti abanye bebethi mhlawumbe le ibizokuba yinto yenyanga ezithile, kungakho kwaba lokungezwani.”
Post published in: News