UChombo, ongungqongqotshe njalo kahulumende wezabelo, kubikwa ezama ukuzimisa kahle phambi kokhetho lwebandla oluzayo. Yena uthe akakwazi ukuthi kulemizamo eyenziwa ngaye nsitha kulindawo.
“Angilani laloko okwenzakala ngaphansi ebandleni, kodwa ngikubona kungamanga aluhlala lokho. Bengikwele China mina kodwa angikuzwanga lokho. Isikhathi sokuthi ngiyeke iskhundla singafika ngizakwenza lokho kungangihluphi laka nci,” kutsho uChombo.
Uthe imibuzo eminenig kumele isiwe kusikomitshi wezopolitiki elizweni lonke jikelele kulelibandla, uWebster Shamu, ongasatholakalanga ukuze sikhulume laye.
Abakhulu be Zanu (PF) kulindawo bathi ukwahlukana kuzabuye kulilulaze lelibandla. Abalandeli bebandla sebelobe izincwadi ezinengi zisiya kubakhokheli besabelo, bebanxusa ukuthi bangenele, kodwa azikatholi mpendulo.
Incwadi lezi, ezibhalelwe usihlalo wesabelo, u John Mafa, uhlangothi olukhokhelwa nguChombo kubikwa luzifakela abameli kukhetho eziqintini langaphansi, njengase Vanad Mine, Tafara, Munyape, Mazvikadei lase Mutorashanga.
Abanengi ososihlalo abafana lo Tecla Kwahla, Samson Akim, Tendai Kawara kunye lo Chisora sebekhutshiwe kwafakwa abatsha.
“I Zanu (PF) isilahlekelwa ngamandla esiqintini sase Mutorashanga ngoba sokulabandeli abalutshwana. Abasele bekhokhela ngabameli kudale lephalamende lamakhansila kuphela,” kutsho ingxenye yenye incwadi.
“Abalandeli sebebizwa ngabaka Matibiri labaka Chombo, kukanti labo abaka Matibiri sebesengozini yokuxotshwa ebandleni.”
Owayengusosihlalo sika Ward 15 e Mutorashanga, uPatson Chindamba, yena uthe abaka Chombo baphethe bethusela abantu baka Matibiri. Uthe njalo, uke waphathwa kabi laye ngemva kokuthunjwa kwakhe ngabolunye uhlangothi bambuzisisa ngokulwisana ebandleni.
Ubuye njalo wathi labo abaka Matibiri sebethuselwe ngokuthathelwa amapulazi.
“Sifuna abakhulu bebandla bangenele kuloludaba ngoba lungenza amabandla aphikisayo athole abantu kulindawo,” kutsho uChindamba.
UMatibiri yena walile ukuphawula ngaloludaba.
“Ngisanda kubeka umnewethu ngakho lesi akusiso isikhathi sokuthi ngikhulume ngezombangazwe. Khuluma labakhethi ngoba yibo abazi ngcono ngalokhu,” kutsho yena.
Post published in: News