U Petros Makaza lo Golden Nhika base Epworth kubikwa bathathwa lisotsha eligcina umongameli, uWillima Makurumidze, layabathela phakathi kwe Chipangano, lithi bebe ingwane yalo kunye lomakhalekhukhwini. Ababili laba betheswa icala lokwephula umthetho lapho bemiswa emantshini yeHarare ngenyanga kaNcwabakazi.
Amagqwetha abo, akhokhelwa ngu Tawanda Zhuwarara wamagqwetha amalungelo abantu, enza isicelo sokuthi indaba le isiwe enkantolo enkulu, ethi ukuvikeleka echukwini kwezibotshwa akulandelwanga kulaba, nanku phela amapholisa abathuthela phezu kweChipangano, esaziwa ngochuku.
Athe njalo amagqwetha, ngemva kokuhlukunyezwa kwabo, ababili laba akungethethwe kahle icala ngoba vele besebephathwe kubi.
Imantshi uMunyonga ubephe amapholisa kuze kuyefika mhla ziku 15 kuMfumfu ukuthi aqede uphenyo ngokuhlukunyezwa kwalaba, kodwa uZhuwarara utshele leliphephandaba ukuthi impumela yalolophenyo ayikazakali ngoba amapholisa ahlezi phezu kwayo njalo awafuni kusebenza lokhu.
“Amapholisa awafuni ukulalela ngalindaba njalo lakhathesi impumela yalolo phenyo ayikazakali. Kungalokho inkantolo ingakaphenduli isicelo sethu sokuthi lindaba isiwe enkantolo enkulu yelizwe,” kutsho uZhuwarara.
Amgqwetha la athi ababili laba batshaywa kakhulu eMbare ngamalunga Chipangano, kwathi ngemva kwamahola amanengi okuhlunkunyezwa basiwa enkambeni yampholisa aseMbare, lapho abavulelwa khona icala mhlaka 12 ngo Ncwabakazi, qede basiwa enkambeni yase Epworth. Mhlaka 14 ngenyanga efanayo baphiwa ibheyili yamadola angamatshumi amathathu.
Post published in: News