Indawo le isibizwa ngokuthi Shawasha Corporative njalo izitolo ezikuyo ziphethe ifulegi yalelibandla.
Omunye olesitolo lapha, uthe isehlakalo lesi sikhululwe ngabakhulu balelibandla eHarare. Omunye wentsha le, ozibize ngoDanny, uthe umkambo lo usungulwe ngabalandeli baleliqembu abahlala emafulathini ase Matapi le Shawasha, kodwa usuthatha njalo labase Epworth.
Uveze njalo ukuthi ngomehluko kwabase Magaba lase Mupedzanhamo, abathengisa e Shawasha abahambisi lutho kusodolobho. Uthe njalo ubudlelwano babo le Zanu (PF), ababotshwa yikhansili, yona edla ubhedu kulezi nsuku.
“Asikhokhi lutho kukhansili thina ngoba singabe Zanu (PF). Sikhokha nje i$1 ngeviki ukuze kubhadalwe abalinda ebusuku. Kungakho sikhokha $4 ngenyanga kuphela njalo ayiyi kukhansili,” kutsho uDanny.
Uveze njalo ukuthi umuntu kufanele aqale abe ngophethe ikhadi le Zanu (PF) ukuze athole indawo emkambo we Shawasha.
“Bonke abathengisa lapha baphethe lelikhadi le Zanu (PF). Ungakathengisi, kufanele njalo ucubungulwe kabanzi yintsha yebandla, kodwa ma kunguwe (kuntatheli yethu), kulula ngoba ngizibambile lapha.”
Ngokutso kwalumfana, abathengisi bahlangana ngoLwesithathu lunye ngalunye ukuze bakhulume ngezopolitiki lokuthi bakhankasele iZanu (PF) eMbare. “Akumelanga ucabange ngokuxotshwa lapha ngoba senza lokhu ngezibusiso zebandla njalo sitshelwe ukuthi ngeke saxotshwa,” kutsho uDanny.
Umfana lo uvumile njalo ukuthi abanye omaqhuzu be Zanu (PF)kulindawo balazo izitolo ezinengi kulo umkambo. “Mina ngilezitolo ezintathu lapha njalo ma ufuna esinye, ungangipha nje i$20 kunye le$4 kanogada ngenyanga,” kutsho umfana lo.
Phezu kwezitolo, lintsha ilendawo zokupaka imitshova eShawasha ukuze kume izimota ezithwala abantu abahamba phakathi kwe Mbare le Epworth.
Abatshayeli esikhulume labo bona bathe bakhokha imali kuntsha ye Zanu (PF) le ukuze bapake lapha. “Sibhadala $2 ngasikhathi sinye sokuthwala lapha. Imali le ithathwa yintsha yeZanu (PF) ababusa kulindawo,” kutsho omunye umtshayeli, ongazivezanga ngokwesaba ukuhlukunyezwa.
Intsha ye Zanu (PF) ebambane le Chipangano, yazakala kakhulu ngodlame lapho ithatha umhlaba lezakhiwo eMbare. Ngeviki edluleyo, usosihlalo walelibandla eHarare, uAmos Midzi, utshele iThe Zimbabwean ukuthi iChipangano isivaliwe, kodwa ubufakazi obusobala bona buyakusola lokho akutshiloyo.
Post published in: News