Ikhombe abalwela impi yenkululeko njengalabo abangaphuma phambili ngokuqala loludlakela.
“Lanxa isimo somnotho eZimbabwe sesiguquke sabangcono, ukudonselana ngezopolitiki lusaqhubeka ikakhulu lapho kulungiselelwa ukuvotelwa kwesisekelo mbuso kunye lokhetho olukhulu ngomnyaka ka 2012 kusiya ku 2013. Ukuthunjwa kwamapulazi lakho, okulandelwa ludlakela lokwebiswa kwempahla, kusaqhubekela phambili. Kufanele liqaphele lapho livalatshela leliya,” kutsho isixwayiso lesi.
Abewofisi yemazweni angaphandle kwe Ngilandi bathe udlakela lusaqhbueka kulandela ukwehluleka kwamabandla akuhulumende womanyano ukucindezela izivumelwano ezenziwa eqala uhulumende lo, kunye lokuqhubeka kodlame kumalunga eMDC-T akuhulumende.
“Nanzelelani ukuthi isandla ezivuliweyo siyinsika yebandla ebeliphikisa, elikhokhelwa ngosengu Ngqongqotshe kahulumende u Morgan Tsvangirai. Kanjalo ukuphakamisa isandla ngobungane kungabekwa kakubi.”
Yengeze lencwadi yathi abe Zimbabwe Republic Police abangethenjwe ukuthi basize enkingeni. NgoNcwabakazi nyakenye, oqondisa inhlelo ku ZimRights NGO Forum, ehlanganisa inhlanganiso ezilitshumi lasitshiya galolunye, u Blessing Gorejena, uthe inhlanganiso le ibhekele ukuthi kungavuka udlakela ngesikhathi kuvotelwa isisekelo langokhetho.
Izizalwane zase Ngilandi zixwayiswe njalo ngochuku lwabonogada bakamongameli Robert Mugabe.
“Sezizinengi izigigaba abazenzayo, ezinjengokutshaya abantu ngoba beme endaweni ezingasizo, kumbe bekele ukuma ngesikhathi esifaneleyo.”
Incwadi le ibuye njalo yaqonqosela ngemikhuhlane evuka buvumbuvumbu kuleli, ikakhulu isihudo.
“Isihudo sibikwe endaweni ezinengi, ikakhulu eHarare, lapho amanani aso asedlule inkulungwane ezine. Ukumemetheka kuyaqhubeka kusiya kwezinye izabelo njalo kufanele libone ukuthi lizivikele kulokhu ngokuhlatshwa amajekiseni afaneleyo,” kutsho iNgilandi, ethe ezempilo kuleli azethenjwa. Ixwayise njalo ngokungethembeki kwendiza zakuleli lemigwaqo emibi okwamagama.
Post published in: News