Lelibandla layangisa endaweni ezithi kwelama Nyika, eMasvingo kunye laseningizimu yelizwe, phezu kwawo onke amadolobho lapho ehlala idindwa khona yi MDC kusukela ngomnyaka ka 2000.
Uphenyo luveze ukuthi inengi lemali yokukhuphula intsha ngezenotho ekhitshwe ngabe Zimbabwe Youth yasiwa lapho iZanwu eyanqotshwa khona ngomnyaka ka 2000.
Ingwalo ezibonwe yileliphephandaba ziveze ukuthi iHarare ithole imali edlula zonke engange $395 000, imaNyika yathola $303 000 kwathi iBulawayo yona yazuza $146 000, ngemizamo yokukhuphula intsha ukuze iqale indlela zokuziphilisa.
Intshonalanga yaseMashoneni, lapho inkokheli yeZanu, uMongameli Robert Mugabe adabuka khona, ithole $198 000.
I Zanu (PF) yathola isihlalo esisodwa kuphela esigodlweni lapho iMDC eyathola khona ezingamatshumi amabili lasitshiyangalombili, kukanti kwelamaNyika, iMDC yathatha ezingamatshumi amabili kuqathaniswa leziyisithupha zeZanu. IMDC yabutha zonke koBulawayo lapho iZanu eyaphuma ilebngise izandla.
Umqondisi we ZYC, uLivingstone Dzikira, walile ukuthi imali iphisanwa ngokwebandla kuze kuthengwe amavoti. “Imali akusindlela yeZanu (PF) ngoba ibhanga elisiza ukuyipha alisilebandla. Inkulumo enjalo ivela ebantwini asebebhekane lokhetho, kukanti ingwalo zethu zibonisa ukuthi loba ngubani ulakho ukuthola usizo, kungakhathalekile ukuthi uphuma kuliphi ibandla.”
Post published in: News