Mutemo unosunga mapurisa neunobata vashandi vehurumende munyika hauvatenderi kuita zvematongerwo enyika. Chiwetu, uyo achiri kushanda semukuru mukuru wemapurisa akaudza vagari venzvimbo iyi kuti achashandura mamiriro ezvinhu munzvimbo iyi kana akakunda musarudzo.
“Ndinovimbisa kupedza hurombo hwenyu mune zvehupfumi kana ndikakunda, ndikatora chigaro ichi. Vose vachangopedza chikoro vachawana mabasa muchiuto nemuchipurisa nekuda kwezvandinokwanisa kuita. Sezvo ndiri mukuru mukuru muchipurisa, kuvawanisa mabasa muchipurisa harisi dambudziko. Ndine hukama hwakanaka zvekare nemukuru mukuru wemauto vaConstantine Chiwenga uye ndichashandisa hukama uhwu kupinza vechidiki vose kuchiuto,” Chiwetu akaudza chaunga chevagari venzvimbo iyi makumi mashanu.
Akavimbisa madzimai enzvimbo iyi kuti vachabatsirikana mune zveupfumi nekuimba dzimbo dzekutunhidza musangano weZanu (PF) dzavachange vachibatsirwa kunyora.
“Dzimbo dzekurumbidza Zanu (PF) dzakanyorwa muno dzakatapwa kuitira
kuzoridzwa pazvivhitivhiti nemumawairesi. Sevanyori, muchabhadharwa miripo yebasa renyu. Muchaona kuti musangano weZanu (PF) musangano unosimudzira veruzhinji.”
Madzimai aya akavimbiswa zvekushandisa mukurima zvinenge mbeu nefotereza.
Chiwetu akavimbisa zvekare “kupa rubatsiro rwemari rwekuvamba mabasa ekupfuya huku senzira yekusimudzira hupenyu hwevagari ava.”
“Ndichisiyana nevamwe vezvamatongerwo enyika vanosarudza, ndichabatsira kumutsiridza mabasa ekupfuya nguruve pamishandirapamwe yevarume. Nokudaro, ndinokurudzira varume kuti vavambe mishandirapamwe yevanhu gumi paboka yandichabatsira nerubatsiro rwehupfumi hwekutanga mabasa ekupfuya nguruve. Ndichaedza nepandinokwanisa kushandura mamiriro ezvehupfumi hwenyu,” akadaro Chiwetu.
Mambo Lovemore Zenda ‘Svosve’ vakasimbaradza kuti vagari vanofanira kuvhotera Chiwetu musarudzo dzekutanga dzebato reZanu (PF).
“Ndinokukurudzirai mose kuti munofanira kuvhotera Chiwetu musarudzo dzekutanga dzebato. Chiwetu mwana wedu, anobva mudunhu redu.
Zvirokwazvo ane zvido zvedunhu redu pamwoyo.”
Vagari venzvimbo iyi vakaenda kumusangano uyu vakatsanangura Chiwetu “semunhu akaipa uye anogona kukuvadza” uye vakati kutaura nezvake maringe nezvematongerwo enyika kunogona ‘kuvakuvadzisa sezvo kuchityisa.’
Madzishe nemasabhuku akayambira vagari venzvimbo iyi kuti havafaniri kuvhotera bato rinopikisa reMDC sezvavakaita muna 2008.
Vanotarisirwa kukwikwidzana naChiwetu musarudzo dzekutanga dzebato reZanu (PF) idzi ndivaLawrence Katsiru naamai Tsitsi Sekeramayi, mudzimai waSeneta weZanu (PF) vaSydney Sekeramayi.
Post published in: News