Lokhu kuveza sobala lokhu osekutshiwo ngabahliziyi abanengi, ukuthi umzila ohlukanisa ibandla leli lamabutho usuphandlekile, njengoba amabutho amakhulu esezibona njengabezombangazwe bengakabi ngamabutho.
UBrigadier-General, uCallisto Gwanetsa yena ufuna ukubasedale laphezulu Chiredzi , kuthi uBrigadier-General Livingstone Chineka afune ukumela iZaka. Owayemele intshona ye Bikita njalo eyintatheli u Colonel Claudius Makova yena uzimisele ukuma edale eliphezulu eBikita, kukanti uBrigadier-General uVictor Rungani uzifunela ukuba ngomunye njalo wabamela lindawo yeBikita, njengo UBrigadier Gibson Mashingaidze.
Ko Gutu, lapho owayengumlawuli wamabutho u General Vitalis Zvinavashe abhuqwa khona ngu Empire Makamure webandla leMDC –T ngomnyaka ka 2008, kubikwa uColonel Mutero Masanganise elwela isikhundla.
Kungakedluli inyanga kufe umphathintambo wezemfundo ephezulu, u Stan
Mudenge, owayemele inyakatho yase Masvingo, uColonel Davis Marapira
usephumele obala wathi uyasifuna lesi sikhundla njalo useqalile ukukhankasa, lanxa iZanu (PF) isithi akuvumelekanga ukukwenza lokho ngaphandle kwemvumo yenkokheli zebandla.
Entshona yeMasvingo, obezama ukuba ngumkhuludolobho, u Major Bernard Mazarire yena usethe ufuna ukuhluthuna isikhundla ku MDC-T, kukanti edolobheni leli, owayekhokhela ibandla le United People’s Party, osengowe Zanu (PF), u Colonel Daniel Shumba laye ufuna okufanayo.
Umgcinisihlalo weZanu (PF), uLovemore Matuke, uthe akukafaneli ukuthi iloba ngubani aqale ukukhankasela ukhetho ebandleni ngoba inkokheli zingakavuli ukhankaso.
“Akukubanga ukuthi abantu bazimise kahle, kodwa kungadala ingxabangxoza ebandleni,” kutsho u Matuke.
“Asilandaba lokuthi umuntu ubelibutho kumbe hatshi, nxa ekhethwe ngabantu uzavunyelwa ukubamela, kodwa akukho lapho esithi amabutho kufanele aphathwe njengamaqanda.”
Okhulumela ibandla leli elizweni lonke jikelele, uRugare Gumbo yena uthe inkundlankulu izahlangana maduze ukuze ilungise indlela ezalandelwa nxa kubanjwa ukhetho lwebandla. Kubikwa amabutho engevumele ongalwelanga impi yenkululeko ebusa leli.
Lokhu sokubekwe njengokuthi ungqongqotshe kahulumende u Morgan Tsvangirai kangebuse angaze anqobe kukhetho okluzayo. Kodwa abahlaziyi sebexwayise ukuthi ukufaka amabutho kukaMugabe kuzadala ukunqotshwa okuyangisayo okhethweni, bethi njalo uMugabe kufanele avalele amabutho enkambeni nxa efuna ukuthola okokudlisa umuthi.
Ucabangani?
Kambe nga amabutho engamenza ayangiswe okhethweni uMugabe le Zanu (PF) yakhe?
Email: editor@thezimbabwean.co.uk
Facebook: https://www.thezimbabwean.co.uk/#facebook
Twitter: https://twitter.com/thezimbabwean
Sms: +27 79 570 9663, +263 736 999 005
Post published in: News