Umongameli Robert Mugabe usethe ukhetho luzabanjwa ngoMbimbitho ozayo, lanxa amanye amabandla ezombangazwe labafuna inkululeko bethi kungangcono lumiswe kancane ukuze kwenziwe inguquko emqoka.
Kodwa iZanu (PF) yona isiqale njalo indlela zayo zokuzama ukwethusela abavotayo ngodlame.
Kusenjalo, omela inkaba yase Mutasa edale lephalamende, u Trevor Saruwaka we MDC-T ngeviki edluleyo uthe iZanu (PF) ibisivule izikhundla zokuhlukumezela abantu ezikolo ebndaweni le.
“Okumangalisayo yikuthi iZanu (PF) ikhuthaza ukuthula emini yenze udlame ebusuku ngoba abalandeli bayo basanda kuhlasela isikolo seDomborutinhira lapha, bethi bafuna indawo yokuhlalisa intsha egoqela umtshayeli walelibandla kwele Manyika, uClara Mukahanana,” kutsho u Saruwaka.
Uthe njalo iZanu (PF) isazimisele ukubisela emuva inzuzo elethwe nguhulumende womanyano. “Bafuna ukuhlala ezikolo betshaya abantu njalo lintsha ayilethi lutho ezikolo lezi. Bazabanjwa ngubani ma bevuka ukeketani?”
Uthe njalo abacatshangelwa ukuba ngabalwela impi yenkululeko bazame ukubamba ngamandla ababalisi ukuthi bathathe izikhundla ku Zanu (PF).
Abamela izikolo bona besebegobe uphondo ngokwesaba, kodwa imizamo ibisisenziwa yokuxotsha ababalisi kuqhatshwe intsha le engafundanga.
“Ngihlangane labamela izikolo ngaloludaba njalo bathe bayesaba kakhulu yikho bevumile,” kwengeze uSaruwaka.
“Kodwa ngibatshele ukuthi isinqumo sikahulumende ngesithi kungavunyelwa ukuthi izikolozisetshenziswe ngale indlela ngoba lokho kuphazamisa imfundo.” UAndrew Chigumbura, owalwela impi eManyika uthe, “Sifuna kuphela ukubamba imihlangano yehtu lapho njalo akekho ofanele asivalele lokho ezweni esalilwelayo. Ungubani yena vele uSaruwaka osengazama lokho? “
IZanu (PF) isike yakwenza ukuhulkumeza abantu ezikolweni.
“Ukuvalelwa kwezombangazwe ezikolo kuyinto endala kuleli njalo kwenzelwa ukuvikela abantwana ngoba izikolo ziyindawo yokuthula. Ukwalelwa kwezombangazwe ezithatha uhlangothi lakho kumi njalo ophethe isikolo oweqa lumthetho uzajeziswa kabanzi,” kutsho umphathintambo wezemfundo, uDavid Coltart.
Post published in: News