Umphathintambo wezemali, u Tendai Biti usanda kuveza ukuthi leli lizaphoqelelwa ukuthi lincenge amazwe asentshonalanga ukuthi aphe imali le.
Uthe yena amazwe anjenge Ngilandi lelase Norway alomlandu wokupha iZimbabwe imali le ngendlela ifana laleyo enjengeyezempilo lemfundo.
Kusenjalo, isikhulumeli seZanu (PF), u Rugare Gumbo, uthe ibandla lakhe lona liphisana lalokho okutshiwo ngu Biti.
“Asingethathe imali emazweni angasentshonalanga ukuze sense ukhetho lwethu,” kutsho u Gumbo.
Uthe njalo lamazwe azifunela ukubhidliza ibandla lakhe le Zanu (PF) kungakho awangethenjwe.
“Singayithatha kanjani imali yamazwe asitshaya ngezijeziso zenotho? Kulihlaya elinjani lokho? Asingeyithathe imali evela kweleNgilandi kumbe amanye afanayo. Imali kufanele ivele kwezinye indawo, hatshi laba. Lokho kungumbono wethu njengebandla,” kutsho uGumbo.
Abe Zimbabwe Electoral Commission bathi bafuna imali engangezigidi ezingamakhulu amathathu ukuze kubanjwe ukhetho lwesisekelo sombuso welizwe kunye lokhetho olukhangelelwe ngomnyaka ozayo. Engangezigidi elikhulu ngeyesisekelo, kukanti eseleyo ngeyokhetho olukhulu.
Ensukwini ezimbalwa ezedlule, umsekeli kasihlalo we ZEC, uKazembe uthe ikomishini le ayilayo imali yenhlelo zokhetho lolu.
Okhulumela iMDC-T, u Douglas Mwonzora, uthe uhulumende womanyano ubevele eziphilela nje ngemali yamazwe asentshonalanga kusukela esungulwa.
“Ayikho leyodwa into embi ngemali le. Eqinisweni ibivele isiza izophatha zonke inhlelo zethu eziqakathekileyo ezinjengemfundo, ezempilo kunye lesisekelo sombuso,” kutsho u Mwonzora, othe imizamo yeZanu (PF) yokwala imali le iyindlela yokuphosela uhlelo enkingeni nje kuphela.
“I Zanu (PF) iyalwesaba ukhetho.”
Okhulumela iMDC-N, u Kurauone Chihwayi, uthe iZimbabwe ilemvumo yokufuna imali le emazweni entshonalanga.
“I MDC ayilansolo ngemali evela ngaphandle kwelizwe izosiza kunhlelo ezinje imbala kulesizatho esiqondileyo salokho,” kutsho uChihwayi, othe ukwebiwa kwezembiwayo yizikhulu zebandla le Zanu (PF) yikho osokwenze ilizwe labheka phandle lifuna imali.
“Siphethwe nzima yikuswelakala kweqiniso ekwembisweni kwendayimana ithengiswa nsitha. Uhulumende kufanele ayeke ukweba ezembiwayo zakuleli anduba afune usizo lwangaphandle.”
Post published in: News