Lanxa kulokukhonona kwababheke ezokhetho, abeMDC zombili kunye le SADC, uMugabe uphikelela ethi ukhetho luzabanjwa ngoMbimbitho womnyaka ozayo.
Lokhu kungaphandle kwesivumelwano esalotshelwana phansi ngomnyaka ka 2009, ukuthi ukhetho kufanele lubanjwe kuphela ngemva kwenguquko enengi egoqela isisekelo sombuso esitsha ukuze kube khona ukulingana.
Ekhuluma ngomhlangano wokuthula obanjelwe eMkoba ngempelaviki, uMatibenga, obuya njalo amele iKuwadzana edale lephalamende, uMatibenga uthe uMugabe uzama ukudida abantu nje kuphela.
“Uyazi mhlophe ukuthi akwenzayo akuvumelekanga, kodwa uzaqhubeka ekwenza ukuze azame ukubhekisa abantu eceleni kwalokho okufuneka kwenzakale phambi kokhetho. Asilwesabi ukhetho, kodwa kufanele siqede ukubeka sobala indlela evunyelweneyo yalo, ezaveza impumela engaphikiswayo.”
Omela iMkoba edale lephalamende njalo engunobhala wezamanzi ezweni jikelele kubandla le MDC-T, uAmos Chibaya, uphinde wathi u Mugabe kasimnini weZimbabwe.
“Abantu akusibo baka Mugabe, ngakho kangeke asitshela into yokwenza abuye akutshaye indiva lokho esikufunayo okuqakatheke njengokwakhe. Asingeke sivume thina,” kutsho yena.
Post published in: News