Varimi ava vakaudza mutori wenhau webepa reZimbabwean kuti zviri nani kutengesa chibage chavo nemutengo uyu pane kutengesera GMB iyo inotora nguva refu kuvabhadhara.
“Mumwaka wapfuura, GMB yakanonoka kutibhadhara uye yakatipa mari shomanana pachibage chataive tavatengesera. Vazhinji vedu takademba chataive taendesera chibage chedu kwavari,” vakadaro Gogo Sheila Mashinge, vane makore makumi matanhatu nemaviri ekuberekwa.
Vakati vanoita zvekutengesa -tengesa, vazhinji vanobva kuHarare vanouya nenhumbi nechikafu vachida muripo wechibage.
Fibeon Mwayera uyo anobva kuWard 13 kwaMurehwa akati akasarudza kutengesa chibage chake mushure mokuona kuti akarega kuita izvi, chibage chake chinogona kuparadzwa nezvipfukuto.
“Kuchengetedza goho kunonetsa sezvo ndisingakwanisi kutenga mishonga yekuchengetedza chibage changu kuti chisadyiwe nezvipfukuto. Zvine hungwaru kutengesa chibage changu iye zvino,” akadaro Mwayera.
Maria Ruchima uyo ane makore makumi matatu nemaviri ekuberekwa achibva
kuBudiriro 5 muHarare akati akakwanisa kuwana chibage chinosvika matani maviri nemutoo uyu wekuripwa nevarimi ava nechibage.
“Ndinoenda nenhumbi dzimwe nguva nezvekudya kuvarimi ava ivo vondiripa
nechibage. Muenzaniso, ndinogona kupa murimi mugomo mumwe chete wekutakurira iye ondiripa nechibage chinozadza mugomo mumwe chete nechidimbu,” akadaro Ruchima.
“Ndinotakura chibage ichi kuendesa kuHarare usiku nekuti kuchitakura masikati kunodhura sezvo mapurisa achitinetsa zvinopedzisira
zvakonzera kuti tivape chioko muhomwe pega pega pavanenge vari,”akadaro mudzimai uyo.
“Ndinotengesa chibage ichi nemutengo unoita madhora mana pamugomo wega wega uye ndizvo zvinondiraramisa.”
Post published in: News