I Chipangano isithe abalandeli be MDC bangalubhadi kwezinye indawo ze Epworth yabuye yasungula izikhundla zokuhlukumezela labo abacatshangelwa ukuba ngabalandeli balelibandla, ngendlela efana leka 2008.
Abakhokheli bebandla le Zanu (PF) abafuna ukumela lindawo kukhetho oluzayo kubikwa kuyibo abakhokhela loludlame.
Leliphephandaba likhulume labanye asebephunyuke kuloludlame ngemva kokuhlukunyezwa ngenyanga ka Ncwabakazi ngoba kuthiwa baphikisana lomongameli Robert Mugabe.
Babalise lokho abedlule kukho bathi njalo sebephila ngokwesaba ngoba bethuselwe ngokubulawa yile intsha.
Ababili balaba, abathi u Bolden Nhika, ongumsekeli kamlobi wezokukhankasa wentsha ye MDC-T ku Ward 2, lo Petros Makaza, bathe kulebutho likamongameli elithiwa ngu William Makurumidze, elingemva kwalokho.
Bathe u Makurumidze wabalanda endaweni yokuzithokozisa yebusuku e Munyuki wathi kabakhuphe impahla ze MDC-T abebezigqokile ngesikhathi bezinathela.
“Besizinathela e Farai Night Club mhla zilitshumi ngaleyonyanga, uMakurumidze wathatha utshwala bethu ethi usijezisela ukuba ngabalandeli baka Tsvangirai.
“Sala ukulandela lokho ayekutsho, wathi uzosilungisa. Ngelanga elilandelayo weza lapho esihlala khona ehamba lepholisa elaligqoke ezomsebenzi lentsha eyayigqoke izicathulo zamasotsha, kwaba yikuqala kokuhlupheka kwethu,” kutsho uNhika.
Bobabili babotshwa bengatshelwanga icala labo.
“Safakwa emoteni satshelwa ukuthi sisiwa e Chipangano. U Makurumidze yena wagunga ethi sizofela e Mbare kwabalochuku. Sesilapho, sasiwa emawofisini e Zanu (PF) aseMbare 3, lapho esathola intsha yeChipangano isimele ipholisa latshiya izankosi zalo ezazisibophile lapho.”
Ababili laba bathi bahlukunyezwa baphathiswa okwenyamazana kulindawo, betshiswa ngamaphepha ancibilikayo endaweni zonke zomzimba, kukanti babetshaywa kakhulu ngensimbi, izibhakela kunye lokukhahlelwa.
Baqeda umhla lelanga bephethwe kanjalo ngemva baphiwa amapholisa ase Mbare, lapho u Makurumidze afika athi bebemtshontshele.
“Babehlabela ingoma ekhomba ukuthi sibe sesi yinyama yokosa ngesikhathi besidikliza,” kutsho uMakaza.
“Salala ubusuku obubodwa emapholiseni e Mbare anduba sedluliselwe emapholiseni ase Epworth ngosuku olulandelayo, lapho ipholisa elikhulu lasalisa ukuyabona abongi, ethi uzosihambisa ngesikhathi afuna ngaso.”
Ababili laba, ngemva kokuvalelwa okwesikhatshana, bakhitshwa ngemva kokubhadala $30 mhla siku 15 Ncwabakazi.
Post published in: News