Inkulungwane ezintathu zabantu kufanele zithuthiswe anduba kuqale ukwakhiwa kwedamu elikhulu le Tokwe-Murkosi. Omela iningizimu yeMasvingo edale lephalamende, u Walter Mzembi, uthe labo abakulesi simo kufanele bahlaliswe kutsha eduzane nje ledamu leli, ukuze bathelezele ngalo. Izakhamizi lezi sezicele njalo inhlawulo anduba zisuswe, kukanti zithi njalo uhulumende kufanele abone ukuthi izikolo, izibhedlela kunye lemigwaqo kwakhiwe kuqala lapho ezisiwa khona.
Isikhulumeli sezakhamizi lezi, sithe zizokwala ukusuka kuze kugcwaliseke konke lokho ezikufunayo. “Asiyindawo singahlawulelwanga ngokugcweleyo. Uhulumende kufanele akhe njalo izikolo lezibhedlela anduba sisiwe endaweni entsha,” kutsho lesi sikhulumeli. “Sifuna njalo kwembiwe amathuna abokhokho bethu bangcwatshwe kahle endaweni entsha. Asingeke sabatshiya nje edamu leli.” Usiba lukhulu weMasvingo u Titus Maluleke, uthe akulakubuyela nyovane ngokususa abantu laba.
“Asiyikulalela ezinye izikhalazo zalaba Bantu ngoba idamu kufanele liqedwe. Sesiqalile ukuthuthisa abanye, kodwa uhlupho yikuswelakala kwendawo,” kutsho uMaluleke.
Idamu lase Tokwe-Murkosi likhangelelwe ukuqeda ukwakhiwa ngomnyaka ozayo, kukanti ugatsha lwezamanzi lokuthuthukiswa kwezakhiwo luthi soluthole imali eyaneleyo yokwakha lokhu.
Post published in: News